DILI, STLTIMORLESTE.com – Konselhu Ministrus aprova projetu Dekretu-Lei, neebe aprezenta husi Vise Ministra Solidariedade Sosial no Inkluzaun, Céu Brites, kona-ba kriasaun Subsidiu Saude no Nutrisaun neebe Kondisional ba inan isin-rua, inan fo susu no labarik sira too 3 neebe iha situasaun vulnerabilidade sosial.
“Mekanizmu protesaun sosial foun ida-nee ho objetivu atu kombate ma-nutrisaun kronika no promove Saude inan-oan liu husi fornese apoiu mistu neebe kompostu husi ai-han adekuadu no insentivu finanseiru ho valor dolar amerikanu 25 ho periodisidade trimestral,” haktuir nota komunikadu neebe STL asesu husi Governu, Kuarta (30/07/2025).
Programa nee sei implementa iha faze inisial, hanesan projetu-pilotu, iha munisipiu Kovalima, Ermera no Rejiaun Administrativa Espesial Oekusi Ambenu, rejiaun neebe identifika liuliu hanesan nivel aas ba ma-nutrisaun infantil.
“Subsidiu nee fornese ba feto no labarik sira iha situasaun vulnerabilidade sosioekonomika neebe iha komprovadu, no ninia atribuisaun neebe kondisiona ba kumprimentu rekizitu minimu adezaun ba akompanamentu pre-natal (molok moris), pos-natal (hafoin-moris) no dezenvolvimentu infantil, neebe inklui konsulta regulares iha sentru Saude, vasinasaun neebe atualizadu no sesaun akonsellamentu nutrisional, tuir padraun tekniku neebe Ministeriu Saude aprova ona,”
Jestaun no monitorizasaun ba programa nee sei asegura husi Ministdriu Solidariedade Sosial no Inkluzaun, servisu hamutuk ho Ministeriu Saude, Finansas, Administrasaun Estatal no Institutu Nasional Estatistika Timor Leste, no bele hetan mos apoiu tekniku husi parseiru dezenvolvimentu sira.
Diploma nee mos prevee kriasaun baze-dadus sosial espesifika ida no halo avaliasaun independente ida ba projetu-pilotu hafoin fulan 36 implementasaun nian, ho objetivu ba ninia expansaun eventual iha nivel nasional tomak.
(alb)
One Response
Orguilho Ba Oitavo Governu Nia Programa Piloto Ba Inan Isin rua no ba labarik Sira… No La Haluhan Hato’o Parabens No Agradece Ba Oitavo Governu Forca