DILI, STLTIMORLESTE.com – Too agora osan konsesaun eskolar seidauk tama iha konta bankaria eskola nian, tanba husi parte eskola seidauk hatama relatoriu.
Haktuir Diretor Eskola Sekundariu Jeral 10 Dezembru Komoro, Manuel Verdial ba jornalista STL iha nia knaar fatin Komoro, Kuarta (01/10/2025).
“Konsesaun eskolar nee seidauk tama, ami nian relatóriu mos seidauk hatama, tanba hau foin mai iha Julhu tinan nee nia laran. Nee duni semana nee bele hatama, no osan nee rasik too agora seidauk tama iha konta bankaria eskola nian. Neebe kada estudantes sei hetan US$ 2. Ami nian dadus estudantes iha anterior ninia, antes estudantes husi eskola Rainha da Paz mai ami iha 1.487,” dehan nia.
Manuel afirma, maibe bainhira aumenta ho estudantes husi Eskola Rainha da Paz, daudaun nee sira nian total estudantes hamutuk 1,680. Neebe bainhira hatama relatóriu mak osan nee foin bele tama iha sira nian konta eskola ninia.
Iha fatin seluk, Diretor Nasional Ensinu Sekundariu iha ME, Benjamin Gomes da Cruz Fernandes hatete, agora sira sei halo pedidu hetan aprovasaun, depois de ida nee atribui konsesaun eskolar ba eskola sira. Molok ezame nasional, bele atribui ona osan ida nee ba eskola sira, liu-liu eskola sekundariu sira.
Jornalista: Jacinta Sequeira
Editora: Domingas Gomes
