DILI, STLTIMORLESTE.com – Montante konsesoes eskolar fulan 2 nia hamutuk US$ 183.792,00, neebe sei halo pagamentu iha tempu badak nia laran ba eskola publiku sira.
“Konsesoes ba trimestre tolu nian ba tiha ona no ezekusaun mos hotu ona. Agora eskola idak-idak hatama relatoriu mai ami para ami bele submete ba iha finansas hodi haree ami nian prosesu ezekusaun too iha neebe. Rezultadu husi konsesoes hanesan ita boot sira haree, eskola sira la hanesan uluk, hanesan FINANTIL, 10 de Dezembru, 4 de Setembru, eskola nia kondisaun la hanesan ho uluk ona, sira nian biblioteka uluk livru sira soe deit, bee bele tama, maibe agora mudansa iha eskola,” haktuir Diretor Nasional Ensinu Sekundariu Jeral iha ME, Benjamin Gomes da Cruz Fernandes ba STL iha nia knar fatin Vila Verde, Kuarta nee (27/11/2024).
Benjamin hatete, rezultadu husi konsesoes nee mak eskola barak mak pinta ona, hadia ona odamatan no monta ona vidru, hadia jestaun administrasaun iha laran. Nee duni rezultadu husi orsamentu nee mak mudansa ona iha eskola idak-idak, nee orsamentu trimestre tolu nian neebe sira fo fulan 8 nian, no agora falta fulan 2 nian neebe iha tempu badak sei tama iha konta bankaria eskola publiku idak-idak nian.
(jac)
