DILI, STLTIMORLESTE.com – Konsesoins eskolar seidauk tama iha konta bankaria Eskola Tekniku Vokasional (Tekvo) 28 Novembru Bekora.
Lia hirak nee hatoo husi Diretor Eskola Sekundariu Tekniku Vokasional 28 Novembru Bekora, Tomas Pinto ba jornalista STL iha nia knaar fatin Bekora, Kinta nee (22/05/2025).
“Ami nia konsesoins eskolar seidauk tama konta bankaria eskola nian, tanba ami TECVOC sei tama iha fulan Junhu se lae Novembru mak foin tama dala ida, nee duni too agora ami nian konsesoins eskolar seidauk tama, iha ezame primeiru periodu neebe mak ita halao tiha ona nee ami deve rental US$ 50,” dehan nia.
Nunee mos Diretor Nasional Ensinu Sekundariu Tekniku Vokasional, Fernando Mouzinho Gama dehan, konsesoins eskolar ba tekvo nee sei distribui ba eskola tolu nolu (30), ba eskola publika nomos ba eskola privadu sira neebe sei fo apoiu ba sira, maibe eskola tekvo publika nee agora prosesu nee lao hotu ona, hein prosesu ba iha pagamentu ninia, maibe tekvo privadu hanesan tekvo Mau Mali Maliana, orsamentu tama ona sira nian konta bankaria, ba eskola tekvo hetan subvensaun publika hanaran fundu operasional eskolar nee, fundu ida nee tinan ida nee implementa ba eskola lima (5), tekvo ida iha Atabae, tekvo iha Leorema, tekvo iha Vikeke no eskola rua agrikultura neebe uluk MAP mak kaer, nee laos konsesoins eskolar.
“Atu informa iha nee katak, konsesoins eskolar neebe Ministeriu Edukasaun iha, iha tinan kotuk ita nian orsamentu nee ita sempre tau iha kategoria tranferensia publika, nee signifika katak orsamentu nee ita bele halo transferensia direta ba konta bankaria eskola sira, tanba ida nee vantajen boot ida ba Ministeriu Edukasaun, liu-liu ba tekvo katak, konsesoins eskolar ba tekvo nee ita fahe ba kategoria rua (2), ida mak konsesoins eskolar, ida fali bolu fundu operasional eskolar, ida nee mak ita tau iha ita nian eskolar,” dehan Fernando.
Nia dehan, parte finansas atu halo pagamentu iha fulan nee,se lae fulan oin mak halo pagamentu total, konsesoins eskolar nee estudantes ida hetan US$ 2, ida nee tama hotu ona, hein iha pagamentu ninia, nee duni konsesoins eskolar no fundu operasional eskolar nee lao hotu ona ba finansas nian.
(jac)
