DILI, STLTIMORLESTE.com – Konsesoins eskolar tama ona iha konta bankaria eskola sekundariu nu 4 Setembru Balide, no osan refere sei responde ba administrasaun ninia.
Tuir Direitor Eskola Sekundariu Jeral nu 4 Setembru Balide, Sergio A. da Cruz ba jornalista STL iha nia knaar fatin Balide, Segunda nee (02/06/2025).
“Ami nian konsesoins eskolar nee tama ona ami nian konta bankaria eskola nian, ninia montante rihun US$ 28, osan ida nee ami sei uza ba responde administrasaun nian, nunee mos uza ba iha agora daudaun labarik sira nian toilet nee aat ona, nomos sasan ba iha ezame trimestre nian, maibe relatoriu mak seidauk, tanba agora daudaun servisu sei lao nafatin, too ba iha ezame trimester segundu ninia, nee hotu mak foin bele hatama relatoriu,” nia esplika.
Sergio dehan, konsesoins eskolar nee tama iha fulan kotuk, nee duni osan nee tama konta bankaria hodi nunee eskola bele uza osan ida nee tuir nesesidade eskola nian, depois mak hatama fali relatoriu.
Entretantu Diretor Eskola Sekundariu Tekniku Vokasional 28 Novembru Bekora,Tomas Pinto hateten, konsesoins eskolar seidauk tama iha konta bankaria eskola tekniku vokasional 28 de Novembru Bekora.
“Ami nia konsesoins eskolar seidauk tama konta bankaria eskola nian, tamba ami TECVOC sei tama iha fulan Junhu se lae Novembru mak foin tama dala ida, nee duni too agora ami nian konsesoins eskolar seidauk tama, iha ezame primeiru periodu neebe mak ita halao tiha ona nee,ami deve rental US$ 50,”dehan nia.
Entretantu Diretor Nasional Ensinu Sekundariu Tekniku Vokasional, Fernando Mouzinho Gama dehan, konsesoins eskolar ba tekvo nee sei distribui ba eskola tolu nolu, ba eskola publika nomos ba eskola privadu sira neebe sei fo apoiu ba sira,.maibe eskola tekvo publika nee agora prosesu nee lao hotu ona, hein prosesu ba iha pagamentu ninia, maibe tekvo privadu hanesan tekvo mau mali Maliana orsamentu tama ona sira nian konta bankaria, ba eskola tekvo hetan subvensaun publika hanaran fundu operasional eskolar nee, fundu ida nee tinan ida nee implementa ba eskola lima, tekvo ida iha Atabae, tekvo iha Leorema, tekvo iha Vikeke no eskola rua agrikultura neebe uluk MAP mak kaer, nee laos konsesoins eskolar.
(jac)
