DILI, STLTIMORLESTE.com – Prosesu konsesoins eskolar ba ensinu sekundariu no tekniku vokasional (Tekvo) ba tinan nee hein iha faze transfere osan ba konta bankaria eskola, tanba munisipiu hitu (7) mak ninia relatoriu seidauk kompletu.
Asuntu nee hatoo husi Diretor Nasional Ensinu Sekundariu iha Ministeriu Edukasaun, Benjamin Gomes da Cruz Fernandes ba jornalista STL iha edifisiu ME, Tersa nee (15/04/2025).
“Atu informa deit katak, konsesoins eskolar ninia prosesu ba tinan ida nee hein tama ba iha faze transfere osan ba iha konta bankaria eskola nian, ami demora oituan iha servisu transfere osan, tanba regras orsamentu mak deside katak, molok atu halo eskola refere kumpri uluk lai ninia relatoriu tinan kotuk ninia, tanba konsesoins tinan kotuk nian ami fo tiha ona ba sira, hakarak ka lakohi eskola gasta ona osan iha tinan kotuk nian, nee tenke submete relatoriu mai ami para ami bele fo fali konsesoins ba tinan nee nian,” nia afirma.
Benjamin dehan, bainhira relatoriu nee tama ona, sistema nee nakloke fila fali ba sira neebe haruka osan ba sira, tanba nee orsamentu estadu hakarak ka lakohi tenke kumpri regras orsamentu, ate ohin nee iha munisipiu lubuk ida, relatoriu tama kompletu ona mak Munisipiu Aileu, Ainaro, Bobonaro, Kovalima, Ermera no Manatuto, sira nee tama kompletu ona.
“Munisipiu 8 mak relatoriu seidauk kompletu, nee mak Munisipiu Vikeke, Manufahi, Likisa, Lautem, Dili, Baukau. Hirak nee mak relatoriu tama seidauk kompletu, maske eskola balun tama ona, maibe balun seidauk, agora ida neebe seidauk tama nee sei fo impaktu ba eskola hotu,” katak nia.
(jac)
