DILI, STLTIMORLESTE.com – Tribunal Judisial Primeira Instansia Dili liu husi leitura akordaun deside absolve arguida FJF husi Krimi Burla Agravadu, tanba konsidera la provadu ba iha akuzasaun Ministeriu Publiku (PM) nian.
Iha sala julgamentu laran Juiz prosesu Jose Gonsalves deklara katak, depois de Tribunal rona tiha arguida, lezadu no sasin sira nia deklarasaun, Tribunal fundamenta iha faktus provadus no mos faktus la provadus.
Tribunal konsidera faktus provadus katak, iha momentu neeba arguida hasoru malu ho lezadu iha Tasi Tolu, no arguida aprezenta nia aan ba lezadu katak, arguida servisu iha Asosiasaun Rezistensia Nasional Libertasaun Veteranus.
Provadus mos katak, iha hasoru malu nee arguida konvense lezadu no ikus mai lezadu mos fiar ba arguida hodi halo kobransa ba benefisiariu sira atu trata pensaun Veteranus no Martires nian.
Provadus mos katak, husi benefisiariu sira neebe lezadu ba konvense hodi simu osan, inklui mos lezadu nia familia rasik barak. No provadu mos katak, iha modelu/tipu prosesu oin rua trata pensaun Veteranus no Martires, prosesu normal no prosesu urjente, prosesu normal hatama osan ho valor US$ 250, sertidaun RDTL no kartaun eleitoral.
No provadu mos katak, benefisiariu nain 15 obpta ba tipu normal ho valor total US$ 2545,00, benefisariu 11 obpta ho tipu urjente ho valor total US$ 6450,00, deskrisaun pessoal Valor global husi tipu normal no tipu urjente US$ 10.500,00.
Provadus mos katak, husi arguida nia hahalok nee kauza too ikus benefisiariu sira la hetan pensaun. Provadu mos arguida konfesa, arepende no lezadu sira seidauk hetan pensaun, no osan neebe mak iha arguida nia liman seidauk fo fila ba lezadu sira.
Tribunal konsidera faktus la provadu mak laos arguida mak ba konvense benefisiariu sira, maibe lezadu mak ba konvense hodi koalia oinsa no ikus mai benefisiariu sira hodi fiar, entrega dokumentus no osan. No Tribunal haree iha kazu konkretu laos arguida mak ba konvense benefisiariu sira, maibe lezadu mak ba konvense, tanba nee Tribunal haree la iha Donu ho intensaun.
Juiz prosesu esplika katak, Tribunal julga deit ba iha krimi furtu neebe iha krimi nee hateten katak, ema neebe bosok, maibe Tribunal haree arguida la provadu komete krimi refere, tanba laos arguida mak tun diretamente ba hasoru benefisiariu sira hodi konvense sira, no momentu neeba lezadu mak tun diretamente ba.
Tanba nee Tribunal julga akuzasaun improsidente la provadu la iha donu ho intensaun ho hanoin atu bosok, tanba nee deside absolve arguida husi akuzasaun Ministeriu Publiku nian.
Tribunal deklara, absolve arguida husi krimi refere, maibe Tribunal deklara kona-ba osan neebe arguida sira foti ona kontinua selu fila fali ba benefisiariu sira ka kontinua toma responsabilidade ba osan nee hodi fo fila fali ba iha benefisiariu sira.
Lee tiha desizaun nee, Tribunal mos husu atu parte Ministeriu Publiku no Defeza la konkorda bele halo fali rekursu tuir prazu neebe iha.
Antes nee, iha alegasaun Prokurador Pedro Baptista husu ba iha Tribunal atu kondena arguida pena prizaun tinan 2, tanba konsidera prienxe duni elementu krimi neebe iha.
Enkuantu husi parte defeza nian haree katak ba prosesu ida nee lezadu sira mos ho intensaun atu buka osan Estadu nian, tanba sira hatene hela atu trata dokumentus veteranus tenke liu husi dalan seluk.
Maibe sira mos uza arguida atu tarata dokumentus atu bele hetan osan Estadu nian. Tanba nee defeza konsidera la prienxe ba krimi neebe MP akuza ba, tanba nee husu Tribunal atu absolve arguida.
Iha faktus sufisiente katak, iha fulan Janeiru tinan 2019, data la lembra ona, iha Tasi Tolu arguida aprezenta aan ba lezadu NJS katak, arguida servisu iha Asosiasaun Rezistensia Nasional Libertasaun Veteranus no nia prontu atu ajuda lezadu hodi trata sira nian osan veteranus no martires nian.
Hafoin rona tiha, lezadu fiar no iha interese hakarak trata nia inan RFS nia osan veteranus neebe uluk nuudar delegada OPMT.
Arguida dehan, iha modelu/tipu prosesu oin rua trata pensaun veteranus no mártires, prosesu normal no prosesu urjente, Prosesu normal hatama osan ho valor US$ 250, sertidaun RDTL no kartaun eleitoral.
Prosesu urjente hatama osan ho valor US$ 500, sertidaun RDTL no kartaun karik sira neebe seidauk iha sertidaun obitu hatama tan US$ 100. Atu manan lezadu nia fiar no aumezmu tempu hetan nia devada, arguida tenta trata kartaun ida fo ba lezadu.
Kuandu simu tiha ida nee, lezadu fiar karak arguida iha duni dalan atu bele trata asuntu veteranus nia hodi hetan pensaun, husi neeba lezadu hahu rekolha dokumentu sira tuir kriteriu arguida nia.
Lezadu konsege rekolha dokumentu sira no ho osan hamutuk benefisiariu ema 26, inklui mos dokumentu sira lezadu nia inan RFS.
Husi benefisiariu ema 26, konforme lista rekerimentu, iha kontribuisaun osan husi benefisiariu sira iha modelu/tipu oin rua.
Benefisiariu nain 15 obpta ba tipu normal ho valor total US$ 2545,00, benefisariu 11 obpta ho tipu urjente ho valor total US$ 6450,00, deskrisaun pessoal valor global husi tipu normal no tipu urjente US$ 10.500,00.
Valor osan hirak neebe indika iha leten, lezadu entrega ba arguida iha nia hela fatin Tasi Tolu.
Iha momentu neeba arguida prometa ba lezadu katak, iha loron neebe determinadu atu simu pensaun mak la iha rezultadu, arguida sei devolve fali osan hirak nee hotu ba sira.
Hafoin simu tiha osan no dokumentu sira nee, arguida promete ba lezadu katak benefisiariu sira sei simu sira nian direitu pensaun iha loron 15/03/2019, entretantu ate loron prometidu la akontese, bainhira konfirma fali ho arguida, nia hatete katak sei tama iha loron 28/04/2019, data ida ikus nee mos la akontese.
Entretantu, iha loron 02/05/2018, arguida informa ba futuru benefisiariu sira atu fila fali ba kontinua sira nian pensaun iha Banku BRI, entretantu konfirmasaun data ida ne mos la akontese (osan la tama).
Arguida aktua ho propozitu no konkretiza duni, neebe determina lezadu entrega osan ho valor global US$ 10.395,00 ba arguida, ho hanoin ida katak ba tuir arguida sei tarata asuntu sira nee, maibe ate a data la akontese.
Arguida kria kanliansa/konsense lezadu hodi hetan vantagen ekonomika neebe nia konsege enganu/bosok oin-oin ho (kartaun falso), hatene momos katak nia konduta kauza prejuizu patrimonial ba lezadu.
Arguida halo sempre ho forma livre, voluntaria no konsiente, hatene momos katak ninia konduta proibida no punivel husi lei penal.
Ho hahalok hirak nee, Ministeriu Publiku akuza arguida FJF nuudar autoria material ho forma konsumada ba krimi Burla Agravada, neebe previsru iha artigu 167 husi Kodigu Penal.
Audensia julgamentu nee prezide husi Juiz Koletivu, Jose Gonsalves, Jumiati Freitas no Jose Quintao, Ministeriu Publiku reprezenta husi Prokurador Pedro Baptista, arguidu hetan asistensia legal husi Defensor Publiku, Germano Ramos.
(ter)
