BAUKAU, STLTIMORLESTE.com – Projetu konstrusaun edifisiu eskola terseiru siklu Ensinu Baziku Filial (EBF) Kaibada Uaimua, Postu Administrativu Baukau Vila, Munisipiu Baukau seidauk finaliza, tanba razaun badaen sira okupadu ho lia mate no lia moris.
Koordenador Eskola EBF Kaibada Uaimua, Augosto Lopes hateten, projetu konstrusaun iha Eskola Ensinu Baziku Filial Kaibada Uaimua hamutuk sala 3 ba estudante terseiru siklu, neebe fundus husi Programa Nasional Dezenvolvimentu Suku (PNDS), hodi Suku aloka ba konstrusaun refere hahu iha fulan Janeiru 2024, maibe too ohin loron seidauk semata, tanba parte badaen sira servisu tarde.
“Konstrusaun nee tarde oituan, tanba primeiru material iha, maibe ema ida halo nee mak ladun badinas, loron ida mai loron ida la mai, laiha kontrola husi Xefe Suku nee mak tarde liu, atu besik tinan ona mais seidauk prontu,” Augosto hateten ba jornalista sira iha EBF Kaibada Uaimua, Sesta (14/11/2025).
Koordendor eskola nee preokupa ho konstrusaun refere, tanba tuir kontratu projetu konstrusaun husi Programa Nasional Dezenvolvimentu Suku ho durasaun fulan 3, maibe konstrusaun refere too ona tinan maibe seidauk finaliza, tanba falta kontrola husi Autoridade Suku Kaibada.
Nia komenta, konstrusaun refere ba estudante terseiru siklu sira iha Kaibada Uaimua, tanba daudaun sala prosesu aprendizajen nian no utiliza deit sala estudante sira husi primeiru segundu siklu, nunee parte suku aloka orsamentu husi Programa Nasional Dezenvolvimentu Suku hodi konstrui sala prosesu aprendizajen ba estudante sira atu utiliza ba iha prosesu aprendizajen nian, maibe seidauk finaliza.
“Hau husu aselera lalais para tinan oin mai nee bele uza ona,” Augosto rekomenda.
Hatan ba kestaun nee, Xefe Suku Kaibada, Cosme da Costa Lopes rekonhese, projetu konstrusaun sala aprendizajen ba estudante sira husi terseiru siklu iha Kaibada Uaimua hahu iha fulan Janeiru tinan 2024 no parte Suku nafatin kontrola no monitoriza ba projetu refere, maibe seidauk finaliza, tanba kestaun nesesidade kultural husi badaen sira neebe servisu iha konstrusaun refere.
“Ita hanesan Autoridade, ekipa neebe estabelese iha Suku no Postu nafatin halo servisu monitorizasaun, signifika ida nee ita nia responsabilidade eskola nee hakarak ga lakohi nia tenke hotu, nia prosesu lao neineik tanba badaen sira afetadu ho lia mate lia moris kona direita konserteza tenke husik servisu, laos katak sira laiha responsabilidade agora ita atinji ona 75 ou 80% agora ita haree hela,” Cosme akresenta.
Xefe Suku nee garante, konstrusaun refere sei finaliza iha tempu besik, tanba progresu fiziku krese ona besik 80% neebe nafatin akompanha husi ekipa Programa Nasional Dezenvolvimentu Suku husi Postu no Suku.
Projetu konstrusaun refere ho valor orsamentu PNDS 2024 hamutuk rihun US$ 39 neebe sei fo benefisiu ba estudante, iha eskola Ensinu Baziku Filial terseiru siklu Kaibada Uaimua husi setimu anu too nonu anu nain 84 kompostu feto mane.
Entretantu tuir observasaun Jornalista STL nian iha terenu nota katak, projetu konstrusaun refere, kalen taka finalizadu no azuleju ba sala 3 hahu taka besik atu remata, parede haleu pinta remata ona, rin ba janela no odamatan estabese ona no instalasaun fiu eletrisidade hahu lao inklui rin ba plafond estabelesidu.
Jornalista: Emerenciana Pinto
Editora: Carme Ximenes
