DILI, STLTIMORLESTE.com – Ministeriu Interior (MI) aprezenta ona ba Kafi, kona-ba projetu konstrusaun no reabilitasaun ba edifisiu Polisia Nasional Timor Leste (PNTL).
Tuir Ministru Interior, Francisco Guterres katak, projetu lubun boot ida iha aprovasaun, primeiru aprovasaun iha postu Fronteira nee los ona, reabilitasaun ba postu fronteiras hotu ona ho nia komponente asesories diak neebe hamutuk kada postu nee ohin aprova hotu ona husi Kafi, hein deit ba prosesu CNA.
“Hau fiar katak semana ida nee nia laran nee prosesu nee bele hotu, no ita hahu ona konstrusoens ba iha postu Fronteira, tanba kondisoens aat liu tan ona,” dehan MI, Francisco.
Nia dehan, segundu konkorda ona katak sei iha akizasaun ba uma imigrasaun, iha uma ida ke governu atu halo akizasaun, ida nee atu sai futuru ba instalasaun ba iha Imigrasaun para bele hadia sira nia fatin servisu hodi halo servisu neebe diak, depois bele serve ema sira neebe mak mai nee iha fatin neebe mak diak.
Nia haktuir, antes liu ona Kafi aprova ona orsamentu balun neebe mak sei tau para halo konstrusaun balu neebe mak ba iha Quartel Jeral neebe mak nia prosesu atu remata ona, espera katak iha tinan ida nee nia laran sira hahu ona,epera tinan ida ho balu sira bele iha ona uma Quartel Jeral foun.
Nia dehan, edifisiu PNTL Dili nian tama hotu ona sei hahu uluk konstrusaun ba iha Quartel Munisipal haat mak hanesan, Dili, Ermera,Likisa ho Aileu, maibe la taka dalan wainhira kuartel sira neebe mak presija hadia, nafatin husu orsamentu ba iha Kafi para kontinua foo autorizasaun para foo despezas ba Quartel sira seluk.
Governante nee akresenta, iha Eskuadra lubun bot kedas ba sira neebe mak iha Postu foun hanesan iha Loes, Hatulia B no iha Lorehe, Kelikai.
“Hau atu informa ba ita boot sira katak, hau halo tiha ona despaisu diploma Ministerial neebe mak halo hotu ona, aprova ona kona-ba estabelesimentu eskuadra iha postu foun sira nee katak, ita sei iha Eskuadra 6 neebe mak agora Komando Jeral prepara, atu bele tau kondisoens iha neeba husu Ministeriu para, atu prepara infraestruturas sira bele uza kuandu sira muda ona ba fatin sira nee,” hatete governante nee.
Nia dehan, tinan ida nee halo ona prosesu, espera tinan oin halo ona prosesu konstrusaun.
(mar)
