DILI, STLTIMORLESTE.com – Oras nee daudaun konstrusaun edifisiu foun Pre Eskolar Moris I atinji ona 55%.
Haktuir Eliseu Antonio Izu. Eng. hanesan supervisor DNIE, Ministeriu Edukasaun, Munisipiu Dili hatete, hahu halo konstrusaun nee iha fulan Outubru 2024, maibe iha neeba halo servisu la tuir kontratu nee, tanba primeiru komplikadu oituan kona-ba rai ida atu harii edifisiu nee, tanba ida nee komplikadu entre profesor ensinu baziku ho pre eskolar nian.
“Neebe ita halo servisu tarde tiha, entaun konstrusaun nee foin mak hahu iha Dezembru 2024,. tanba nee ita la halo tuir tempu neebe atu finaliza nee, agora pedidu extensaun kontratu dala ida ona, neebe ita fo tan kontratu fulan haat nian, nee duni Julhu tinan ida nee bele finaliza ona konstrusaun, nee tuir tarjetu mak nee, agora daudaun atinji ona 55%,” dehan Eliseu ba jornalista STL iha nia knaar fatin, Kinta nee (15/05/2025).
Nunee mos Koordenadora Pre Eskolar Moris Foun I, Domingas Beatriz da Cunha dehan, konstrusaun nee sala rua, kuzina ida, sala profesores ida, haris fatin ida, maibe iha parte oin ninia nee atu halo jardin ba estudantes sira, tanba nee bainhira mak finaliza konstrusaun nee seidauk hatene los.
“Ita bele dehan konstrusaun nee atinji ona 55%, konstrusaun nee hahu iha fulan Outubru no atu hotu iha fulan Marsu, maibe tanba udan no edifisiu nee rasik hamutuk ho ensinu baziku, tanba nee seidauk hatene loloos katak bainhira mak konstrusaun nee sei finaliza, tanba agora kestaun udan,” nia esplika.
Nia akresenta, konstrusaun nee sala rua, kuzina ida, sala profesores ida, haris fatin ida, maibe iha parte oin ninia nee atu halo jardin ba estudantes sira, tanba nee bainhira mak finaliza konstrusaun nee seidauk hatene los,” katak nia.
(jac)
