DILI, STLTIMORLESTE.com – Too ohin loron konstrusaun Eskola Sekundariu Jeral FINANTIL seidauk lao, maske sira nian proposta aprova ona.
Kestaun nee hatoo husi Diretor Eskola Sekundáriu Jeral FINANTIL, Aniceto Berlelo ba STL, Tersa nee (03/02/2026).
“Konstrusaun nee seidauk lao, maske proposta aprova tiha ona, maibe ami nian konstrusaun nee seidauk lao too agora,.maibe ami espera katak too tempu ME sei halo ami nian konstrusaun foun hodi bele aumenta sala ensinu aprendizajen ba ami nian estudantes sira, maibe konstrusaun nee rasik too agora seidauk lao. Dezafiu neebe mak ami enfrenta mak ami hakarak uma foun andar,” dehan nia.
Nia afirma, eskola nee risku ba iha inundasaun liu-liu bee nalihun iha sala aprendizajen nian oin tanba natureza, tanba nee mak atu halo konstrusaun foun nee presiza aumenta sala de aula.
Nunee mos Diretor EBC Manleuana, Carlos Correia dehan, sira nian eskola mos atu halo konstrusaun foun ho andar, maibe iha tinan kotuk dehan sei halo konstrusaun nee iha tinan oin 2026, nee duni tekniku husi ministeriu mai sukat tiha ona.
“Ita nian eskola mos atu halo konstrusaun foun ho andar, maibe iha tinan kotuk dehan sei halo konstrusaun nee iha tinan ida nee, nee duni tekniku husi ministeriu mai sukat tiha ona, agora ninia konstrusaun mak seidauk,” nia komenta.
Carlos dehan, konstrusaun nee para bele aumenta sala foun ba estudantes sira, maibe ida nee kompetensia husi ministériu, espera konstrusaun foun ho andar nee too tempu ida parte relevante bele haree asuntu ida nee,” tenik nia.
(jac)
