DILI, STLTIMORLESTE.com – Tuir Tekniku Ministeriu Edukasaun (ME) katak, konstrusaun Eskola Kafe iha Munisipiu Likisa atinji ona 65%.
Haktuir Diretor Servisu Edukasaun Munisipiu Likisa, Julio da Silva ba STL liu husi telefone, Domingu nee (06/04/2025).
“Tuir tekniku husi ME nian hatete, konstrusaun refere atinji ona 65℅, munisipal tau matan deit, maibe ami informa ba tekniku ministeriu nian hodi haree, vizita Ministra Edukasaun nian abertura tiha formasaun depois vizita mos Eskola Kafe hodi haree mos prosesu konstrusaun atu koalia ho kompanhia, maibe diretor kompanhia la iha fatin. Hau mos informa ona ba Diretor Jeral PPII hodi trata asuntu refere, tanba projetu nasional,” nia afirma.
Julio hatutan, foin daudaun Parlamentu Nasional Komisaun G ba direita fatin konstrusaun, maibe diretor kompanhia la iha fatin promete sei bolu direita kompanhia, konstrusaun nee kaer husi Kompanhia Rick Unipesoal Lda, hahu husi tinan 2022, iha edifisiu 2, kada edifisiu sala 6 total 12 salas.
Iha fatin seluk, Visi Prezidente Komisaun G, Deputadu Mateus da Cruz antes nee hatete, pior liu tan trabalhador neebe halo servisu husi tinan 2022 seidauk hetan pagamentu, tanba foin lalais semana ida liu Komisaun G halao ba iha Likisa no trabalhador sira mai hasoru Komisaun G hatoo keixa katak sira seidauk simu nia salariu komesa kedas konstrusaun nee hahu ate adata.
“Hau hakarak foti kestaun ida sobre Eskola Kafe neebe iha Likisa depois de fiskalizasaun, eskola nee hahu konstrusaun iha 2022 ate adata konstrusaun ida nee seidauk too 50%,” dehan nia.
(jac)
