DILI, STLTIMORLESTE.com – Konstrusaun edifisiu Eskola Sekundariu Nobel da Paz falta 25%, hodi finaliza edifisiu refere.
Lia hirak nee hatoo husi Diretor Eskola Sekundariu Nobel da Paz, Jeremias P. de Jesus ba STL iha nia knaar fatin, Kinta nee (07/11/2024).
“Hau hanoin ami nian konstrusaun edifisiu foun ida nee falta deit 25% hodi bele finaliza ona ninia konstrusaun, tanba foin daudaun falhansu oituan, tanba kompanhia neebe halo konstrusaun nee mak iha leten nee ladun metin no nakdoko hela, maibe hau bolu fali badaen ida mai para halo didiak fali, depois sei hada tan batako iha parte andar leten ninia, ho nunee ami nian konstrusaun edifisiu ida nee bele finaliza ona,” tenik nia.
Nia hatutan, edifisiu foun eskola ida nee hahu halo iha tinan 2023, no agora daudaun falta deit 25 % para bele finaliza ona ninia konstrusaun, edifisiu andar ida nee ho ninia total sala hamutuk 12, andar okos sala 6 no andar leten sala 6.
Nia hatutan, orsamentu restu iha mak sei loke tan parte sorin ninia, maibe sei haree lai, tanba orsamentu ba konstrusaun agora nee gasta ona US$ 1 milhaun.
(jac)
