DILI, STLTIMORLESTE.com – Konstrusaun Eskola Sekundariu Nobel da Paz Finaliza ona no kompanhia entrega ona ba sira iha semana kotuk.
Haktuir Diretor Eskola Sekundariu Nobel da Paz, Jeremias P. de Jesus ba STL iha nia knaar fatin Maskarinhas, Sesta nee (11/04/2025).
“Ami nia konstrusaun eskola ho andar ida nee finaliza ona no iha semana kotuk nee kompanhia entrega ona ba ami. Ami nian Konstrusaun nee hahu halo iha tinan 2023 no finaliza ona entrega ba ami iha semana kotuk, konstrusaun nee iha leten sala neen no kraik sala neen, total sala sanolu resin rua inklui haris fatin, no dadaun nee ami nian estudantes sira uza hodi halao ezame ba primeiru periodu neebe mak ohin terminal ona,” dehan nia.
Jeremias dehan, tuir planu ba oin sei aumenta tan andar ida iha leten para halo andar rua, tanba Eskola Nobel da Paz nee kada tinan numeru estudantes sempre aumenta, nunee presiza aumenta sala aprendizajen, konstrusaun nee eskola uza rasik sira nian osan.
“Ami nian planu sei aumenta tan andar ida para halo andar rua, hanesan ita hotu hatene katak, ami nian eskola nee estudantes barak mak mai eskola iha nee,” nia komenta.
(jac)
