LAUTÉM, STLTIMORLESTE.com – Iha tempu badak governu sei halao konstrusaun ba estrada husi Trisula too Tutuala, tanba kondisaun estrada iha neeba aat.
Xefe suku Bauro, Florindo Miranda hatete, Tuir lo-loos konstrusaun estada neeba husi Suku Fuiloro parte Trisula too Tutuala, nia prosesu hahu iha loron 19 Dezembru 2024, tanba nee mai iha tinan 2025 prosesu nee aprovadu, nunee konstrusaun refere hahu iha tempu badak nia laran.
“Ita haree husi konstrusaun estrada nee komunidade iha suku tolu (3), hanesan Fuiloro, Bauro no Mehara nia komunidade mak hamutuk ho kompanhia Xina neebe sai manan nain ba konstrusaun refere mak atu halo servisu, tanba estrada iha area nee nian, tanba nee servisu oinsa atu bele hadia estrada ho kondisaun diak,” dehan Xefi Suku Bauro, Florindo Miranda ba STL iha nia knaar fatin, Sede suku Bauro, Segunda (13/01/2025).
Nia dehan, kondisaun estrada liga husi Trisula too Tutuala kondisaun ladun konduzivu, maibe iha Suku Mehara too Tutuala Vila laran too ilha Jaco kondisaun diak, entaun hadia deit husi area Trisula too Mehara, estrada bele lao ho kondisaun diak.
Tanba nee komunidade husi suku tolu, liu-liu Suku Fuiloro, Bauro no Mehara, prepara aan atu servisu ho kompanhia Xina neebe kona kontratu ba reabilitasaun estrada, oinsa hadia estarada ho kondisaun diak, atu bele fo liberdade ba transporte publiku sira hodi halo movimentasaun ho estabilidade.
Iha parte seluk, Komunidade iha Aldeia Trisula, Octavio Mendes hatete, estrada nee hahu husi Suku Fuiloro, liu-liu iha area Trisula, husu nafatin atu kompanhia neebe sai manan nain ba projetu refere presiza rekruta komunidade iha Suku Fuioloru, Bauro no Mehara atu servisu, tanba estrada nee iha suku tolu (3) nian.
Entretantu Prezidente Autoridade Munisipiu Lautém (PAML), Melio de Jesus hatete, kondisaun estrada sira husi Munisipiu Lautém barak mak la diak, maibe atu fo prioridade uluk ba estrada husi Postu Administrativu Lautém too Lospalos Vila, hafoin halo konstrusaun seluk, liu-liu iha Suku Fuiloro area Trisula too Tutuala nian.
Orsamentu ba konstrusaun estrada husi Postu Administrativu Lautém too Postu Administrativu Tutuala husi Orsamentu Jeral Estadu (OJE) 2024, Governu aloka ba Munisipiu Lautém hamutuk US$ 7.628.912. Husi orsamentu nee ba programa hamutuk 13 mak hanesan, programa estrada no ponte hamutuk US$ 261.105.
Husi programa dezenvolvimentu rural no urbanu hamutuk US$ 1.929.079, programa seguransa nasionál US$ 29.636 programa asesu ba justisa US$ 34.223, programa funsionamentu instituisionál US$ 2.163.115.
(EST 1)
