BAUKAU, STLTIMORLESTE.com – Projetu konstrusaun irrigasaun Uato-ua Modobuti iha Postu Administrativu Baukau Vila, Munisipiu Baukau, sei afeta ba uma lisan Ra’ameta no fatin istoriku subar fatin Komadante FALINTIL, David Alex Daitula nian iha Suku Buibau Baukau Vila.
Xefe Suku Buibau Francisco Ximenes espresa, hafoin ekipa Ministeriu Agrikultura Pekuaria Peskas no Floresta sosializa lalaok projetu konstrusaun irigasaun Uato-ua Modobuti iha Suku Samalari neebe partisipa husi komunidade natar nain afetadu sira husi suku benefisiadu sira kontente tebes ho projetu refere, tanba tinan barak natar balun abandona ho razaun laiha irrigasaun oferese bee ba natar, maibe iha komunidade balu preokupa, tanba projetu irrigasaun refere afeta ba komunidade nia plantasaun, natar no fatin kultural inklui fatin istoriku balu.
“Iha ema balun, ida rua la aseita, tanba ezije mak ai-horis, ida mak fatin kultural ho tan fatin istoriku, mais rai mamuk sira nee sira la ezije,” hateten Francisco ba jornalista sira iha serimonia lansamentu fatuk dahuluk ba konstrusaun irigasaun Uatu-ua Modobuti neebe realiza iha mota Samalari Baukau, Sabadu (16/08/2025).
Nia sublina, hanesan Autoridade Suku identifika fatin kultural afetadu mak hanesan uma lisan Ra’ameta no fatin istoriku mak hanesan fatin abrigu Komadante David Alex Dai-Tula no asistente Kakai nia subar fatin.
Nia esplika, projetu refere afeta ba uma lisan refere mak hanesan uma lisan lokaliza iha foho leten irrigasaun iha okos neebe potensialidade afeta erozaun bainhira konstrusaun hahu no udan monu rai.
Nunee mos fatin istoriku abrigu Komadante FALINTIL David Alex Dai-Tula daudaun iha hela konstrusaun no tuir planu sei termina iha fulan Setembru tinan nee, maibe mos hetan amesa husi projetu refere, tanba konstrusaun abrigu iha leten no irrigasaun besik liu.
“Hau rekomenda ona maibe seidauk hatan, tanba foin mak lansamentu primeira pedra seidauk iha sosializasaun ultimu nian,” katak Francisco.
Nia argumentu, hanesan Autoridade Suku hatoo ona preokupasaun sira nee ba Ministeriu kompetente atu tetu no orienta kompanhia implementador projetu atu asegura fatin kultural no istoriku refere bainhira projetu konstrusaun hahu, maibe seidauk hetan resposta husi Ministeriu.
Mezmu nunee parte komunidade no Autoridade Suku nafatin koopera ho Governu no kompanhia hodi aselera projetu refere finaliza tuir kontratu neebe iha hodi fo benefisiu ba komunidade agrikultores sira iha Postu Administrativu Baukau Vila.
(tom)
