BAUKAU, STLTIMORLESTE.com – Prosesu konstrusaun Katedral Diozese Baukau nian daudaun iha ona prosesu laran, neebe responsabiliza husi Ajensia Dezenvolvimentu Nasional (ADN).
Bispu Diozese Baukau, Dom Leandro Maria Alves esplika, Diozese Baukau presiza iha Katedral propriu, tanba Katedral mak sai simbolu ba Diozese nian, nunee parte Diozese prepara dezenhu no aprezenta ona ba Ministeiru Obras Publikas (MOP) neebe dadaun liu husi ADN haree dezenhu hodi tetu orsamentu.
“Agora prosesu iha hela ADN, neebe ita hein katak buat hotu lao diak ho sarani hotu iha Diozese Baukau nia harohan ba Maromak nia tulun, tinan ida nee rezultadu neebe pozitivu ita bele halo ona,” hateten Dom Leandro ba jornalista sira iha Katedral Santo Antonio, Vila Antiga, Baukau, Kuarta (19/03/20025).
Nia sublina, tuir regulamentu entre Governu ho Dioseze iha akordu anual no akordu kuadra nian, neebe parte Dioseze prepara dezenhu no aprezenta ba Governu liu husi MOP no ADN halo estudu mak kustu konstrusaun liu rihun US$ 100 ba leten kabe kompetensia ba tekniku husi ADN no MOP halo hikas estudu ba dezenhu konstrusaun hodi hatene orsamentu atu gastus ba konstrusaun refere.
Nunee too ohin loron parte Dioseze seidauk hatene total orsamentu atu gastu ba konstrusaun refere husi ADN no MOP, tanba sei iha faze estudu ba dezenhu neebe parte Dioseze aprezenta.
Nia realsa, fatin konstrusaun ba Katedral Dioseze Baukau nian lokaliza iha Suku Bahu, Postu Administrativu Baukau Vila, neebe komunidade sira atribui ona rai hektare neen (6) ho gratuita.
“Agradese ba familia sira neebe mak ho neon laran tomak hakarak oferese rai ba Dioseze hodi bele harii ita nia Katedral hanesan Igreja Inan,” Dom Leandro argumenta.
Bibi atan Dioseze Baukau nee agradese ba parte familia neebe atribui ona rai hektare neen (6) ho gratuita ba Dioseze hodi harii Katedral nuudar Igreja Inan ba Dioseze Baukau nian.
Dom Leandro akresenta, mezmu Dioseze Baukau atual utiliza Igreja Santo Antonio Vila Antiga sai Katedral ba Dioseze Baukau, maibe nee laos kestaun, tanba atu harii Igreja iha ona kada sarani sira nia fuan neebe presiza harii aan hanesan Igreja.
Maibe liu husi konstrusaun Katedral Dioseze Baukau nian bainhira hahu no remata sei fanu liu tan sarani sira hodi moris hanesan sarani neebe halibur ema hotu hodi harii Igreja ida ba ema ida tuir Maromak nia hakarak.
(tom)
