DILI, STLTIMORLESTE.com – Komisaun Anti Korupsaun (KAK) halao inspesaun ba kontrusaun monumentu memorial masakre Santa Krus 12 Novembru 1991, neebe paradu ka seidauk finaliza husi kompanhia.
Tuir Adjuntu Prevensaun no Sensebilzasaun KAK, Rosário Salsinha Araujo katak, projetu ida nee nia tenderizasaun loloos kompanhia neebe responsabiliza maka Bobolait, maibe nia andamentu prosesu lao ba oin, tanba falha iha nia prosesu atu hari monumentu ida tenke ba sosa ka halo monumentu nee iha Portugal, entaun kustu husi monumentu sae tiha no osan neebe preve la too, ida nee maka sai tiha kauza too agora.
“Agora nia andamentu nee oinsa, prosesu nee ami ba halo inspesaun iha terenu halo hotu tiha ona, agora nia prosesu lao ba oin nee ami entrega ona ba servisu investigasaun atu haree ba oin, tanba ita haree katak fo prejuizu lubuk ida ba Estadu,” dehan Rosário ba jornalista sira, iha salaun MJ, Dili, Kinta (04/12/2025).
Nia dehan, falha iha halo monumentu iha Portugal tanba osan folin aumenta, maibe buat seluk mos liga ba iha rate Santa Krus neebe presiza tan projetu nain sira tenke hanoin oinsa atu muda fali rate sira nee, no sai mos difikuldade boot ida tanba muda rate nee la fasil hanesan muda uma, ema nia rate tau kleur ona iha neeba atu muda prosesu naruk.
Ida nee maka falha iha neeba, maibe Komisaun Anti Korrupsaun (KAK) la hola ba kestaun, kestaun maka oinsa utiliza osan nee hari monumentu ida nia prosesu tenderizasaun liu tiha, no kontratu mos mate tiha ona. Konsidera falha iha Portugal monumentu neebe prosesa iha neeba, halo iha neeba too agora la realiza, ida nee maka lori ba kauza hodi entrega ba iha parte investigasaun.
Nia hatutan, kompanhia relata hotu ona no iha inspesaun KAK nian bolu sira koalia, sira mos presta ona informasaun iha parte informasaun KAK nian.
Maibe agora kompanhia para ona no projetu nee entrega fali ba projetu nain, maka Ministru Asuntu Kombatente Libertasaun Nasional maka responsabel.
Iha fatin ketak, Akademiku UNTL, Sebastiao Dos Santos dehan, projetu hotu tenke lao tuir kontratu neebe iha, se kuandu lao la tuir kontratu tenke iha intervensaun.
“Hau hanoin importante maka projetu hotu tenke lao tuir kontratu, se karik ida nee la implementa tenke halo inspesau no intervensaun,” dehan nia.
Akademiku dehan, bele kaer projetu importante maka tau iha hanoin katak, saida maka halo atu dezenvolve rai Timor, tanba nee tenke halo tuir akordu neebe iha, laos halo fali buat seluk.
Jornalista: Terezinha De Deus
Editora: Carme Ximenes
