DILI, STLTIMORLESTE.com – Diretora Ezekutiva iha Hospital Nasionál Guido Valadares (HNGV), Cecilia Barros hatete, konstrusaun pediatria andar lima (5) no Unidade Kuidadu Intensivu Kardiolojia (ICCU) iha HNGV daudaun nee atinji ona 40%.
“Too agora konstrusaun ba pediatria andar lima (5) no ICCU iha HNGV nee too ona 40%, nunee espera katak bainhira hotu bele responde ona espasu iha HNGV nee rasik,” hatete Cecilia ba jornalista sira iha HNGV, Dili, Sesta (06/12/2024).
Tuir Cecelia, antes nee Governu prevee ho montante orsamentu hamutuk milhaun $ 9.3 no konstrusaun refere ho durasaun tinan 2, hahu 2023-2025, neebe kaer husi kompanhia China Civil Engineer Constrution Coperation (CCECC).
No lansamentu ba pediatria andar lima (5) no ICCU iha HNGV nee iha inísiu fulan Janeiru 2023 nian, depois konstrusaun ba pediatria andar lima nee foin daudaun iha fulan Setembru mak halo lansamentu ba ai-rin nian neebe agora daudaun nia progresu atinji 40%.
Iha fatin hanesan, Diretor Empreza China Civil Engineer Contruction Cooperation (CCECC), Liang Quing komprometidu katak, sei konklui projetu ida nee ho infraestrutura neebe kualidade ba Governu no povu Timor Leste.
Entretantu daudaun nee konstrusaun pediatria andra lima (5) no ICCU iha HNGV nia orsamentu hamutuk US$ 9,341,663.70.
(jen)
