BAUKAU, STLTIMORLESTE.com – Prezidente Autoridade Munisipiu Vikeke, Francisco Cruz Simões de Gonzaga Soares rekonhese, projetu konstrusaun ponte Welolo, iha Suku Luka, Postu Administrativu Vikeke Vila neebe lansa iha tinan kotuk, too ohin loron parte kompanhia seidauk halo konstrusaun.
“Sim, ponte nee loos duni tanba sira halo konstrusaun nee se la sala kompanhia Joni Z, probelama mak bee makaas halai tuir estrada,” Prezidente Autoridade Munisipiu Vikeke, Francisco Cruz Simões de Gonzaga Soares informa ba STL liu husi telefone, Domingo (22/02/2026).
Nia informa, projetu konstrusaun ponte refere lansa iha fulan Outubru 2025 neebe parte kompanhia destaka ona ekipamentus iha terenu, maibe seidauk iha progresu fiziku ho razaun bee mota iha fatin konstrusaun la fo tempu ba parte kompanhia atu servisu, tanba volume bee boot.
Nia katak, relasiona ho konstrusaun ponte neebe seidauk iha progresu, difikulta tebes komunidade sira nia movimentasaun ho transporte publiku no privadu iha tempu udan, tanba labele liu mota refere, maibe haree ba projetu refere neebe seidauk iha progresu, mak Autoridade Munisipiu Vikeke husu ona Ministeriu Obras Publikas (MOP) atu orienta ekipa tekniku atu tuun terrenu observa ba fatin konstrusaun nunee bele fo solusaun.
“Hau hanoin sira husi Obras Publikas aban too iha Vikeke sira sei halo inspesaun iha fatin neeba, neebe ita hein deit,” Francisco komenta.
Entretantu Ponte Welolo tuir informasaun neebe STL asesu konstrui husi kompanhia Nananiu Unipessoal, Lda ho durasaun servisu loron 365 ho montante orsamentu US$ 4,398,863.24 neebe superviziona husi Ministeriu Obras Publika.
Too notisia nee publika, STL seidauk hetan konfirmasaun husi nain ba kompanhia Nananiu Unipessoal, Lda.
(tom)
