DILI, STLTIMORLESTE.com – Konstrusaun edifisiu foun Pre Eskolar Moris Foun I sei finaliza iha fulan Marsu tinan nee, tanba konstrusaun nee hahu iha fulan Novembru 2024.
Asuntu nee hatoo husi Koordenadora Pre Eskolar Moris Foun I, Domingas Beatriz da Cunha ba STL iha nia knaar fatin, Kinta nee (23/01/2025).
“Ami nia konstrusaun ba edifisiu foun nee komesa ona, hanesan ita boot sira haree, ita bele dehan atinji ona 25%, ami sente kontente, tanba durante nee ami seidauk iha edifisiu ba ami nia estudante sira, tinan barak nia laran ami laiha edifisiu, no foin mak ami iha edifisiu, no ami bele iha fatin neebe seguru ba ami nia estudante sira, konstruksaun nee sala rua inklui haris fatin no sala ba professor sira,” nia afirma.
Nia dehan, orsamentu ba konstrusaun nee mai husi Ministeriu Edukasaun, konstrusaun nee rasik sei finaliza iha fulan Marsu tinan nee, konstrusaun nee rasik hahu iha fulan Novembru 2024.
“Tinan barak ami laiha edifisiu, maibe ami uza deit edifisiu provizoriu, agora ikus mai husi ME bele prepara fatin ida mai ami halo konstrusaun edifisiu foun mai ami, nee ami sente agradese ba ita nian governu liu husi ME, maske ho sala rua, maibe ba ami sente agradese ona, tanba ami bele iha ona fatin,” nia esplika.
Tuir observasaun jornalista STL iha terrenu haree katak, konstrusaun edifisiu foun Pre Eskolar Moris I nee lokaliza iha areador EBC Fatumeta, no kompanhia kontinua halo servisu ba konstrusaun refere.
(jac)
