DILI, STLTIMORLESTE.com – Konstrusaun sala aprendizajen ualu (8) iha Eskola Baziku Sentral (EBC – sigla português) Manleuana adia ba tinan oin, tanba sei hein aprovasaun husi ministeriu.
Diretor EBC Manleuana, Carlos Correia hatoo lia hirak nee ba STL iha nia knaar fatin Manleuana,Tersa nee (11/03/2025).
“Kona-ba ami nian konstrusaun sala ualu (8) nee sukat ona, maibe tinan oin mak halo, maske tekniku husi Ministeriu Edukasaun mai sukat tiha ona, depois hein aprova husi ministeriu mak foin halo. Tanba nee, tinan oin mak hahu halo konstrusaun ba sala ualu (8), ami nian sala ualu (8) nee mak aumenta tan, nee bele fasilita diak liu tan ami nian estudante sira,” dehan nia.
Carlos akresenta, difikuldade neebe mak sira hasoru, liu-liu kona-ba sala de aula neebe sei menus, maibe bainhira sala ualu (8) nee halo ona konstrusaun, nee sufisiente ona ba sira hodi fasilita estudantes sira.
“Difikuldade neebe hasoru mak kona-ba sala de aula, maibe foin daudaun tekniku husi ministeriu mai sukat ona para bele aumenta ami nian sala de aula ba estudante sira, no tinan nee la konsege halo konstrusaun, tinan oin mak halo konstrusaun, tanba ami nian eskola kada tinan numeru estudantes aumenta,” nia deklara.
Iha fatin seluk, Koordenadora Pre Eskolar Moris Foun I, Domingas Beatriz da Cunha dehan, agradese ba Ministeriu Edukasaun, tanba bele halo ona sira nian edifisiu foun, tanba durante nee sira seidauk iha fatin neebe permanente ba estudante sira hodi halao aprendizajen, maibe agora iha ona fatin.
(jac)
