MATEBIAN, STLTIMORLESTE.com – Projetu konstrusaun Sentru Saude iha Suku Laisorulai, Postu Administrativu Matebian, Munisipiu Baukau paradu.
Iha loron 15 Julhu nee, Autoridade Suku lima iha Postu Administrativu Matebian hamutuk ho komunidade no veteranus sira realiza konferensia imprensa, liu husi porta voz Julio Farkhus Pinto hateten, konstrusaun Sentru Saude iha Postu Administrativu Matebian hahu iha loron 19 Junhu 2023 no tuir planu termina iha loron 18 Janeiru 2024 neebe responsabiliza husi kompanhia Dira Nova Unipesoal Lda responde valor orsamentu US$ 368,917.68 ho numeru kontratu RDTL-MS-DNA-PT-23-052, maibe progresu fiziku too ohin loron seidauk atinji 100%, tanba kompanhia abandona servisu iha tinan liu ba.
“Husu Ministeriu Saude toma atensaun ba projetu refere, tanba volume orsamentu neebe mak boot, husu Ministeriu Saude aselera projetu refere atu nunee fo atendimentu ba komunidade Postu Administrativu Matebian no husu Ministeriu buka tuir kompanhia neebe jere projetu neebe mak seidauk finaliza,” rekomenda Julio Farkhus Pinto liu husi konferensia imprensa iha Laisorulai, Tersa (15/07/2025).
Xefe Suku Abo, Fidelio Sarmento dos Santos hateten, durante implementa projetu refere parte Autoridade Suku no komunidade sira koppera tebes, maibe projetu fiziku seidauk atinji 100%, nunee husu Ministeriu Saude atu haree asuntu refere, tanba projetu fiziku foin atinji 75% too kompanhia abandona servisu.
“Tuir informasaun kompanhia fo ba ami nee 75%, agora seidauk finaliza, tanba nee ami ezije Ministeriu relevante para buka nia lakunas presiza fo solusaun ba lakunas sira nee,” nia informa.
Komunidade Martino da Costa neebe entrega rai ba Ministeriu Saude hodi konstrui Sentru Saude refere aleinde mos trabalhodor husi kompanhia Dira Nova Unipesoal Lda hateten, rai neebe nia parte entrega ba Ministeriu Saude hodi konstrui Sentru Saude refere ho medida 100X100, tanba hakarak fasilidade saude besik iha komunidade nia leet, nunee Ministeriu kontratu kompanhia refere hodi halo konstrusaun no parte kompanhia kontratu hikas nia sai hanesan trabalhador iha projetu refere, maibe parte kompanhia seidauk selu nia direitu hanesan trabalhador too projetu abandona, tanba Ministeriu Saude mak hapara projetu refere.
“Hau aprezenta ba Ministra Saude halo oinsa mak hapara too agora, hau servisu iha nee kompanhia telefone mai hau dehan Estadu mak hapara, la hatene tanba saida, maibe nia dehan deit Governu agora nee mak hapara,” Martino haktuir.
Nia konta, iha tinan nee, Ministra Saude too ona iha Postu Matebian partisipasi serimonia balun no nia parte atu hatoo asuntu refere ba Ministra Saude, maibe Ministra lao ses aan husi nia sorin no la kleur Xefe ida husi Ministeriu Saude too kedas fatin konstrusaun hodi observa projetu refere.
“Ida hanesan xefe ekipamentu iha nia okos mai too iha nee husu hau, tiu uma nee laiha kualidade, hau responde, kuandu laiha kualidade hau aranja rai, uma nee laiha kualidade labele halo tutan uma nee, maibe hau fo tan rai hanesan nee bele halo iha fatin seluk,” katak Martino.
Nain ba rai nee deklara, Konstrusaun refere tuir informasaun neebe nia iha parte Ministeriu mak hapara, tanba razaun laiha kualidade, maibe nia husu Ministeriu orienta kompanhia Dira Nova hodi kontinua servisu nunee finaliza projetu refere, maibe Ministeriu mak orienta kompanhia seluk hodi kontinua hikas fali projetu refere, nia parte sei hapara no fo fali rai seluk hodi halo konstrusaun foun, tanba parte kompanhia seidauk seluk nia direitu hanesan trabalhador.
Entretantu liga asuntu nee STL tenta atu konfirma parte kompanhia, maibe la konsege, tanba edifisiu kompanhia refere lokaliza iha fatin seluk.
(tom)
