DILI, STLTIMORLESTE.com – Konstrusaun ba Tribunal haat iha Munisipiu, oras nee daudaun iha faze entrega ona rai ba iha kompanhia, hodi prepara ba iha faze lansamentu tau fatuk dahuluk hodi hahu konstrusaun.
“Agora faze preparasaun tau fatuk dahuluk atu konstrusaun hahu, hau hanoin Marsu karik agora entrega rai para kompanhia sira prepara sira nia servisu,” dehan Prezidente Tribunal Rekursu, Afonso Carmona ba jornalista sira iha Kaikoli, Tersa (27/01/2026).
Nia hatutan, konstrusaun nee laos ba iha fatin julgamentu deit, maibe inklui rezidensia ba Juiz sira, ho orsamentu 4 milhoes, no osan nee laos Tribunal nian, maibe iha Obras Publiku, tanba nee dezenhu no konstrusaun Tribunal nian orsamentu husi MOP.
“Prosesu konstrusaun ba Tribunal haat lao hela no Baukau iha nanis ona, iha foun mak Ermera, Maliana no Vikeke, Baukau konta hotu konstrusaun foun maibe Tribunal iha tiha ona,” dehan nia.
kona-ba Baukau nian entrega ona dezenhu atu sira halao servisu, Suai no Ermera nian entrega ona rai, hela Vikeke nian mak sei ba hodi entrega rai.
Hatan kona-ba Tribunal movel, PTR dehan Tribunal movel hanoin dezde uluk depois aplika ho objetivu katak, atu hakbesik justisa ba povu, segundu atu halo redusaun ba kazu pendente sira.
Nia hatutan, julgamentu movel tama iha programa rutina lao hela, no iha Tribunal Dili iha loron 5 fulan Janeiru hahu tiha ona, maibe buat hotu liga ho pagamentu.
“Tribunal movel lao tuir nia orariu, no fulan ida nee realiza la halo pagamentu ba Juiz sira, tanba osan seidauk sai, haruka Juiz sira ba deit hodi atende julgamentu, depois halo pedidu orsamentu sai mak foin selu Juiz sira,” nia argumentu.
PTR konsidera nee hatudu katak, laos la ajuda Juiz sira, maibe servisu atende justisa ba povu tau prioridade, tanba nee Juiz sira ba ho esforsu tomak, depois mak servisu administrasaun lao atu fasilita buat hotu.
Iha fatin ketak, Jurista Jose Maria Guterres dehan, presiza duni hari Tribunal iha Municipiu, hodi lori justisa hakbesik ba iha komunidade sira.
“Hau hanoin importante duni kria Tribunal iha munisipiu sira hodi lori justisa hakbesik ba iha komunidade sira, atu sira mos sente katak justisa besik duni ba sira,” dehan nia.
Afirma tan, importante duni harii Tribunal iha munisipiu no sujere diak liu tan bele harii iha munisipiu hotu.
(ter)
