DILI, STLTIMORLESTE.com – Diretor Servisu Apoiu Diagnóstika no Terapeutika iha Hospitál Nasionál Guido Valadares (HNGV), Vidal de Jesus Lopes klarifika ba publiku relasiona ho atividade konsulta masal iha Ailok laran nee partidu CNRT mak halao, laos Governu nian.
“Ita nia nasaun nee nasaun demokratiku, ita tenke separa buat ida Governasaun nian ho partidu nian, entaun atividade rua nee ita tenke tau ketak, partidu nee iha nia tempu no iha nia fatin, nee ita mos tenke hatene, informasaun neebe mak espalha iha media sosial dehan, ami lori aimoruk husi HNGV ba halo konsulta masal nee lalos, Klibur Profisional Departamentu Saude nee ba halo asaun konsulta masal iha Suku Ailok, Postu Administrativu Kristu Rei, Munisípiu Dili nee uza orsamentu partidu nian hodi sosa medikamentu konsumaveis lori ba konsulta masal, laos Governu nian,” hatete Vidal ba jornalista sira iha nia knaar fatin HNGV, Teresa (04/03/2025).
Nia informa, sira neebe mak akuza iha media sosial kona-ba lori medikamentu HNGV ba konsluta nee sira iha evidensia bele relata ba autoridade atu halo investigasaun.
“Sira neebe mak akuza ami iha medial sosial kona-ba ami loi medikamentu HNGV mak ba konsulta masal nee sira iha evidensia entaun bele hatoo ba autoridade sira atu halo investigasaun ba ami, maibe se sira la iha evidensia mak koalia, ami mos iha direitu atu keixa fali sira, ida nee la iha problema,” nia esplka.
Nia deklara, kona-ba uza atributu partidu nee tanba nasaun demokratiku, importante mak la bele kahur sasan partidu nian ho estadu nian, bainhira fora husi oras servisu, liu loron feriadu ema hotu iha direitu atu envolve iha partidu politiku atu halo asaun sira nee, importantante mak la bele fo impaktu ba funsionamentu Estadu nian.
Entretantu Akademista Universidade Nasional Timor Lorosae (UNTL), Fakuldade Direitu, Deolindo da Costa informa, relasiona ho publikasaun husi Facebook Aquia Ximenes katak, ukun ona devia hadia sistema servisu saude publiku para povu hotu bele asesu ba tratamentu no kuidadu ida ho dignu, maibe ukun ida so para trosa no halimar deit povu nian vida, iha atividade konsulta Masal nee iha Lider Karismatiku Kay Rala Xanana Gusmão mos iha neeba, nomos militante CNRT mos partisipa masimu hodi fo konsulta Masal ba komunidade Ailok laran.
(jen)
