DILI, STLTIMORLESTE.com – Loron 30 fulan Agostu tinan 1999 importante ba povu, tanba liu husi loron nee mak povu deside destinu nasaun Timor Leste nian ba ukun rasik aan.
“Loron neebe importante tanba iha loron nee maka povu Timor Leste rasik ba partisipa hodi determina nia destinu ba votasaun, tanba nee maka loron nee bolu autu determinasaun deside saida maka povu hakarak,” dehan Jurista Alexandre Corte Real ba jornalista STL iha Dili, Sabadu (30/08/2025).
Tanba tuir nia demokrasia no konsulta popular kona ba autu determinasaun maka lao nunee duni, no fo valor aas ba Mundu liu liu ba Nasoins Unidas bele fo oportunidade hodi hakotu problema iha Timor no mos Mundu Internasional.
“Tinan tinan ita tenke hanoin hikas ba loron nee hodi sente hanesan valor aas ba ita nia desizaun popular, neebe povu tomak fo nee,” dehan nia.
Jurista nee mos relembra katak, momentu neebe sofre terus susar no mate barak, maibe Maromak tau nia bensa, ba povu ida idak hodi deside Timor Leste nia ukun rasik aan liu husi votasaun.
“Loron ida nee ita labele haluha rai hela hanesan istoria ba jerasaun sira neebe tuir mai, katak ukun rasik an nee ita deside rasik laos ema fo deit, ida nee maka valor aas liu ita rasik maka deside,”dehan nia.
Iha fatin ketak, Akademiku UNTL, Sebastiao dos Santos dehan, loron nee importante tebes, tanba nee kada tinan kontinua selebra.
“Hau hanoin loron nee importante tebes, tanba nee kada tinan kontinua selebra, hodi hanoin hikas kona-ba loron nee,” dehan nia.
Jornalista: Terezinha de Deus
Editora: Carme Ximenes
