DILI, STLTIMORLESTE.com – Komando Polisia Nasional Timor Leste (PNTL) Munisipiu Dili detein membru husi Organizasaun Arte Marsiais Persaudaraan Setia Hati Terate (PSHT) nain 6, tanba kontra rezolusaun governu hodi treinu subar iha areadores Hudi Laran, Dili.
Lia hirak nee hatoo husi Komandante PNTL Munisipiu Dili, Superintendente Xefe Polisia, Orlando Gomes ba jornalista sira iha Eskuadra Dom Aleixo, Komoro, Dili, Segunda (28/10/2024).
Nia dehan, Komando Munisipiu Dili hetan informasaun husi komunidade sira informa mai katak, sidadaun balu neebe mak uza atribuitu hodi treinu iha area Hudi Laran nian iha Embaixada Australia nia oin.
Depois simu informasaun orienta kedas forsa rezerva sira tun kedas ba halo kapturasaun ba sidadaun sira neebe mak treinu subar.
“Sira husi Arte Marsiais PSHT nian, hamutuk sira nain 7, depois ita mai halo identifikasaun, nain ida mak minoridade ita liberta no agora daudaun ita detein nain 6 ba 72 oras, hodi halo prosesu aprezenta ba Ministeriu Publiku,” dehan nia.
Razaun kaptura bazeia ba rezolusaun governu 45/2023 katak, suspende ba atividades Arte Marsiais no Arte Ritual, tanba nee mak sira treinu signifika sira desobediensia ba rezolusaun governu nian.
“Tanba nee mak Polisia impoin hodi halo kapturasaun ba membru Arte Marsiais sira neebe mak treinu sem autorizasaun husi governu, tanba governu bandu no suspende ona atividades ida nee seidauk bele loke,” hatete Orlando.
Maibe Orlando dehan, hanesan ajensia seguransa Polísia tenke impoin lei neebe mak rezolusaun governu fo sai.
“Polisia tenke halo kaptura no ita sei kontrola ba fatin sira neebe iha Dili laran kualker se deit mak viola rezolusaun nee ita tenke halo kapturasaun ba sira neebe mak treinu, tanba nee mak ita hotu tenke kumpri lei no rezolusaun governu nian neebe mak fo sai ona, kuandu la kumpri Polisia tenke halo kapturasaun,” nia konklui.
(mar)
