DILI, STLTIMORLESTE.com – Jurista Sergio Dias Quintas hatete, nesariu tebes politika Governu nian atu halo rekrutamentu ba Majistradu Estranjeiru sira.
“Majistradu Estranjeiru sira nee mai atu fortifika no fortalese sistema neebe mak iha, mai para atu implementa deit lei Timor nian,” dehan Jurista Sergio ba STL iha nia knaar fatin Kaikoli, Dili, Kinta (09/01/2025).
Nia hatutan, numeru Majistradu Juiz, Prokurador no Defensor Publiku sira sei limitadu, no sira mai atu kompleta deit, too tempu ida Governu mos haree kondisaun Timor Leste hamriik ona atu halo Justisa nee efetivu no efisiente, sira tenke fila ona.
Iha fatin ketak, Ministru Justisa (MJ), Sergio Hornai dehan, servisu sira liu husi koordenasaun lao hela, atu oinsa halo rekrutamentu ba Majistradu Internasional sira.
“Servisu sira lao hela, koordenasaun halo daudaun hela antes tama ba iha loron Natal ba iha Konselhu Koordenasaun iha Setor Justisa, ami koalia mos ajenda tematika ida mak rekrutamentu Juiz Internasional sira,” dehan MJ, Sergio.
(ter)
