BAUKAU, STLTIMORLESTE.com – Implementasaun projetu konstrusaun ponte foun iha mota Samalari, Postu Administrativu Baguia, Munisipiu Baukau tarde, tanba kondisaun estrada.
“Konstrusaun ponte Samalari nee hahu ona tarde mais, tanba ita nia kondisaun dalan mak hanesan nee, mais hau haree sira komesa book ona iha neeba,” hateten Administrador Postu Administrativu Baguia, Mario Xavier da Silva ba jornalista sira, iha Vila Nova, Baukau, Tersa (12/08/2025)
Projetu konstrusaun ponte foun nee tuir Nia, lansa fatuk dahuluk iha loron 27 Marsu 2025 ba durasaun servisu fulan 12, maibe implementasaun servisu kompanhia nian iha terenu tarde, tanba kestaun kondisaun estrada difikulta mobilizasaun material konstrusaun.
Maibe kompanhia implementador destaka ona material konstrusaun iha terenu no dadaun halo ona servisu hanesan hamoos fatin, prepara fatin ba rin ponte nian no servisu seluk tan neebe kondis ho konstrusaun refere, maibe projetu nee rasik sei la termina tuir durasaun servisu neebe termina, tanba nee Autoridade Postu hamutuk ho Autoridade Suku Samalari sei akompanha kompanhia hodi aselera projetu nee molok udan monu rai.
“Ami ho Xefe Suku sei informa ba sira para aselera konstrusaun, tanba la kleur udan ona, ho kondisaun hirak nee mak ita ezije kompanhia aselera projetu nee,” Mario argumentu.
Autoridade Postu nee esplika, tuir lolos hafoin seremonia lansamentu fatuk dahuluk ba projetu konstrusaun ponte refere, parte kompanhia hahu kedas implementa projetu fiziku, maibe la konsege, tanba ponte Gomilafa jha Suku Alelari, Postu Laga kondisaun aat no medida kloot difikulta mobilizasaun material konstrusaun ho transporte fuzu, nunee hatarde implementa projetu fiziku.
Maibe parte kompanhia utiliza meius tomak mobiliza material konstrusaun konsege ultrapasa ponte Gomilafa too fatin konstrusaun hodi implementa servisu. Mezmu parte kompanhia mobiliza material konstrusaun utrapasa ona ponte Gomilafa, maibe ponte Gomilafa kontinua sai preokupasaun ba movimentu komunidade sira ho transporte publiku no privadu husi Postu Baguia ba Baukau Vila inklui kompanhia responsabiliza projetu konstrusaun ponte Samalari.
Administrador Postu Baguia nee husu Ministeriu Obras Publikas atu fo atensaun ba kondisaun ponte Gomilafa liu husi reabilita no manutensaun ruma, nunee nafatin garante movimentasaun komunidade sira ho transporte publiku no privadu inklui fasilita kompanhia responsabiliza projetu ponte Samalari no projetu seluk tan iha Postu Administrativu Baguia.
Entertantu projetu konstrusaun ponte Samalari responsabiliza husi kompanhia MCC 20 Group Corp. LTD (China), numeru kontratu 009/MOP-2024 ho valor orsamentu US$ 4,025,624.71 neebe supervizaun husi Ministeriu Obras Publikas ba durasaun servisu fulan 12.
(tom)
