BAUKAU, STLTIMORLESTE.com – Kozinha ba estudante sira iha Eskola Ensinu Baziku Filial Katolika Uaimanuboe, Suku Uailili, Postu Administrativu Baukau Vila, Munisipiu Baukau asesu hotu programa merenda eskolar liu husi foti etu lori ba uma.
Koordenador EBF Katolika Uaimanuboe, Andre Bras Belo informa, observasaun eskola nian ba implementasaun merenda eskolar iha EBF Katolika Uaimanuboe durante nee dala ruma la tuir menu neebe iha, tanba tempu estudante han ho modo manu tolun laos manu tolun fuan tomak, maibe fuan ida fera ba rua hodi fahe ba estudante nain rua. No tuir mata dalan tempu etu ho manu tolun akompanha mos ho aifuan sira hanesan hudi tasak no seluk tan, maibe nee la akontese, tanba estudante han etu ho manu tolun rohan ho moelhu neebe limitadu konsidera estudante sira han maran deit liu liu iha loron Tersa no Sesta enkuantu loron seluk diak, tanba han ho modo been.
“Ita haree ba labarik han etu maran deit, tanba manu tolun ho nia moelhu oituan deit laiha modo tahan no seluk tan infeta. Governu dehan ami mestre sira labele han etu restu fornesedor lori ba uma, nee akontese beibeik,” hateten Andre Bras Belo ba STL iha Uaimanuboe Uailili, Sesta (22/08/2025).
Koordenador nee sublina, etu restu neebe kozinha lori ba nia uma foti direitu husi estudante sira neebe falta, maibe lo-loos kuandu estudante falta nia direitu fo ba estudante sira seluk neebe iha laos lori fali ba uma, tanba mata dalan merenda eskolar mak hateten.
Nia fundamenta, kozinha bele lori etu restu ba nia uma, maibe tenke etu restu husi estudante sira nia bikan laran, laos lori fali etu diak ba uma, etu diak nee direitu estudante sira nian, tanba iha mata dalan la indika profesores asesu merenda eskolar inklui kozinha lori etu restu diak nian ba uma.
“Labele dehan labarik han restu iha ona laiha anunsiu ruma fo ba labarik sira depois ita ba ho nonok deit, ida nee laiha ami nia fornesedor liafuan atu repete ba alunu atu han tan nee laiha, labarik sira simu ona etu oituan ga barak sira nia direitu mak nee ona,” Andre Bras Belo akresenta.
Nia deklara, lori fila etu restu ba uma nee akontese beibeik ona, tanba nee parte eskola fo hanoin ba kozinha molok atu tein tenke identifika estudante iha kada sala, nunee bele hatene estudante numeru estudante ativu hafoin tein, maibe kozinha nee kontinua mantein ho numeru estudante neebe eskola rejistu too ikus estudante falta etu restu iha kozinha lori ba uma.
Andre konsidera, asaun neebe kozinha halo viola direitu estudante, tanba lakohi halo komfirmasaun estudante ativu iha prosesu aprendizajem, maibe naran tein tuir deit hodi aproveita etu restu.
Iha fatin hanesa estudante Nelson Freitas no Fijanio Freitas Xavier fo sasin, kada loron kozinha suru sira nia etu barak no han sira, maibe kada loron mos kozinha refere lori etu husi programa merenda eskolar nian ba uma, tanba konsidera etu restu, maibe profesores mos uluk asesu hotu merenda eskolar, agora lae ona.
Liga asuntu nee STL tenta konfirma Xefe Departementu Parke Eskolar Servisu Munisipal Edukasaun Baukau, Sabino Arlindo Ximenes maibe laiha fatin atu fo komentariu, tanba halao hela servisu iha fatin seluk.
Mezmu nunee, maibe antes nee Xefe Departamentu Parke Eskolar nee esplika, regra husi manual programa merenda eskolar hateten orsamentu US$ 0,35 ba alimentasaun nee direitu kada estudante iha loron ida atu asesu merenda eskolar iha eskola, la laos ba profesores, nunee bainhira implementasaun programa merenda eskolar lao mak professores mos han, hahan husi programa merenda eskolar mak inspesaun hetan sei fo sansaun. Tanba nee laiha orientasaun ba profesores sira atu han, hahan husi programa merenda eskolar.
Nunee bainhira profesores ida han, hahan refere ho razaun EJP tein mak liu, nee argumentu deit, tanba kada loron fos neebe tein ba estudante sira, kada estudante hetan 0,075 grama no item seluk sira tan EJP hatene ona kada loron tein kilo hira ba estudante sira iha eskola ida, neebe dehan tein mak liu nee laiha, tanba molok implementa programa refere parte EJP sira hetan ona formasaun no hetan mos formula tein nian atu ezekuta tuir mata dalan PME.
Entertantu total estudante iha eskola Ensinu Baziku Filial Katolika Uaimanuboe neebe asesu programa merenda eskolar hamutuk nain 96.
(tom)
