DILI, STLTIMORLESTE.com – Klibur Profisional Divizaun Saude (KPDS), Partidu CNRT Munisipiu Dili halo lansamentu dahuluk ba asaun karitativa no konsulta jeral ba komunidade sira iha Suku Balibar.
Iha loron Sabadu (09/11/2024), Primeiru Ministru Kay Rala Xanana Gusmão hamutuk ho ekipa KPDS Partidu CNRT Munisipiu Dili, nomos autoridade lokal Suku Balibar halo lansamentu dahuluk asaun karitativa ba povu kbiit laek, aleinde nee halo mos konsulsta Jeral ba Komunidade iha Suku Balibar.
Iha biban nee, Primeiru Ministru Kay Rala Xanana Gusmão liu husi diskursu hatoo parabens ba ekipa KPDS, tanba ohin bele halao ona lansamentu dahuluk asaun karitativa ba povu kbiit laek, aleinde nee halo mos konsulta ba komunidade.
“Parabens ba KPDS nia servisu neebe hahu halo lansamentu iha Balibar,” katak PM Xanana.
PM Xanana hatoo parabens ba KPDS, tanba iha loron Sabadu ekipa kontinua halao atividade tulun povu kiik sira, ida nee mak bolu fraternidade humana.
PM hatete, Freternidade Humana nee la presiza liafuan barak, maibe presiza halo asaun ruma karik haree joven ida ferik ida katuas ruma la hatene nia atu halo saida karik nia hanoin barak presiza ba ajuda no koalia ho sira husu presiza buat ruma karik, se iha fo netik ba karik laiha buat ida fo netik liafuan ruma hodi konsola sira, ida nee buat neebe imi halo daudaun nee tama iha espiritu fraternidade humana ida nee mak hametin partidu nia sentimentu.
Nunee mos Koordenador KPDS, Partidu CNRT Munisipiu Dili, Jaime Do Reis Belo hatete, atividade ohin nee halao asaun karitativa no konsulta jeral iha PM Xanana nia fatin, objetivu realiza nee kumpri kompromisu neebe uluk promete ba povu katak, bainhira manan sei halo kunsulta jeral.
“Konsulta matan no asaun karitativa nee ita halo tiha ona, no ita promete sei halo nafatin too tinan 5 mai sempre halo, tanba nee mak ohin 2024 mai realiza iha Avo Nana nia fatin hodi halo lansamentu, nunee KPDS nee halao nafatin atividade iha tinan oin mai,” katak nia.
Nia hatete, komunidade neebe mak sai benifisiaria hetan karitativa, liu-liu simu nesesidade baziku husi uma kain 86 no komunidade neebe mak simu kalen ho ai hadia uma uma kain 4, aleinde nee halo mos konsulta jeral ba komunidade sira.
Nunee mos Koordenador KPDS Nasional atual Visi Ministru Saude, Jose dos Reis Magno hatutan, atividade nee laos halao iha Balibar deit, maibe sei kontinua mos ba iha munisipiu seluk.
Nunee mos Koordenar CNRT Balibar, Jose Mesquita Magno hatoo agradese ba Maromak tanba liu husi atividade karitativa nee komunidade sira bele hasoru malu ho Lider Karismatiku Xanana Gusmão.
(eme)
