DILI, STLTIMORLESTE.com – Prezensa Konselhu Polisia Komunitaria (KPK) atu apoiu seguransa iha suku, hodi reduz numeru krimi iha Kapital Dili.
Segundu Komandante PNTL Munisipiu Dili, Superintendente João Pires hatete, agora PNTL halo hela treinamentu ba KPK sira para hein tomada de pose ba sira, tanba sira agora kontinua fali para atu haforsa liu tan servisu balun neebe mak iha baze.
“Atu nunee sira ajuda Ofisial Polísia Suku sira para bele prevene situasaun sira iha baze, kuandu buat ruma sira bele informa hela ba OPS, kuandu grave liu bele liga ba patrulhamentu hodi bele prevene situasaun,” dehan nia ba jornalista sira iha Kaikoli, Dili, Kuarta (23/10/2024).
Nia dehan, tenta para tinan ida nee reativa ba suku hotu neebe mak iha Dili laran, atu nunee bele fortifika liu tan servisu Polisia nian hamutuk ho OPS sira.
Iha fatin hanesan, Xefe Suku Kuluhun, Deus Dado Martins hatete, sira partisipa formasaun ba KPK nian, maske inisiu iha ona formasaun, maibe agora mai para atu fo hanoin nafatin ba membru sira atu bele responde situasaun sira liga ba krime nian iha aldeia no mos suku.
(mar)
