DILI, STLTIMORLESTE.com – Ministeriu Juventude Desportu Arte no Kultura (MJDAK) liu husi Komisaun Reguladora Arte Marsiais (KRAM) fo sai informasaun relasiona ho mandatu rezolusaun nu. 60/2024 neebe atu remata iha fulan Abril tinan nee, husu ba organizasaun hotu arte marsiais nian kontinua kolabora hodi kumpri rezolusaun neebe mak Governu fo sai.
Lia hirak nee hatoo husi Prezidente KRAM, Octavio da Conceição liu husi konferensia imprensa iha Lesidere, Dili, Tersa (25/03/2025).
“Hakarak atu informa katak, kuandu Governu deside iha fulan Abril tinan ida nee mak kontinua suspende, husu ba organizasaun hotu arte marsiais kontinua servisu hamutuk hodi kumpri rezolusaun neebe mak Governu fo sai,” katak Prezidente KRAM nee.
Nia hatutan, Governu liu husi Konselhu Ministru deside reativa atividade pratika arte marsiais mak KRAM sei organiza hamutuk ho lider organizasaun arte marsiais hotu ho federasaun TL bele organiza kompetisaun desportu iha teritoriu Timor laran tomak.
Nia mos hatoo apresia ba arte marsiais no estrutura organizasaun nian, tanba durante nee servisu hamutuk ho KRAM hodi garante pas no estabilidade iha rai laran, maske sei iha nafatin membru organizasaun balu neebe lori sira nia problema individu hodi halo provokasaun, maibe la reprezenta sira nia organizasaun.
Nia tenik, tanba krimi neebe akontese dezde rezolusaun numeru 45 sai too ohin bele dehan, la too 90% husi krimi neebe mak akontese no la involve ona iha pratika arte marsiais sira.
Tanba nee iha rezolusaun numeru 60 fo ordem ba MJDAK atu organiza hamutuk ho KRAM organiza kompetisaun silat iha Timor laran tomak, nee programa politika ida neebe mak Governu liu husi IX Governu Konstitusional fo sai.
(EST 2)
