DILI, STLTIMORLESTE.com – Grupu Komisaun Pastoral ba Imigrante husi Konferensia Episkopal Bispu Korea hasoru Prezidente Republika, Jose Ramos Horta, hodi koalia relasaun família nian, liga ho Timor oan neebe servisu iha Korea, tanba lubuk ida husik hela sira nia feen ka laen.
Bainhira remata hasoru malu, Padre Jhon Youn ba jornalista sira iha Palasiu Prezidensial Nicolau Lobato, Bairo Pite, Tersa lokraik (14/10/2025) hatete, kreda Katolika Korea servisu hamutuk ho Governu TL halo estratejia ba trabalhador sira.
Padre Jhon Youn hatete, Grupu Komisaun Pastoral ba Imigrante husi Konferensia Episkopal Bispu Korea aprezenta gratidaun liu husi sakrifisiu ba Timoroan lubuk neebe husik sira nia família ba servisu iha Korea mais menus 7 mil pesoas agora daudaun iha Korea.
“Buat neebe ohin ami aprezenta mos ba Prezidente Republika kona-ba relasaun família nian, tanba ita nia maluk sira neebe ba servisu iha Korea lubuk ida neebe husik hela sira nia feen ka laen. Balun feen mak iha Korea, balun laen iha Korea, entaun buat ida neebe ohin ami koalia mos importante atu Kreda Katolika Korea nian servisu hamutuk ho Governu Timor Leste oinsa bele halo estratejia nunee sira neebe laen iha Korea bele mos lori nia feen sira ba hamutuk, sira neebe feen iha Korea nia laen bele ba hamutuk iha Korea, ida nee mak Kreda Katolika Korea servisu hamutuk ho Estadu Timor Leste halo ida nee, planu iha futuru bele neineik bele halo ida nee, nunee imi nia relasaun bele forte nafatin, labele LDR hela deit,” dehan Padre Jhon.
Padre hatete, tuir lei Korea nian sira neebe iha direitu atu lori sira nia família ba hela iha Korea, tinan balun mak sira neebe 17, maibe sira neebe 19 nee kategoria tama iha un-skill working, sira neebe laiha skill ba servisu iha Korea. Maibe sira neebe 17 nee iha ona skill hodi servisu no hetan viza 17 nee, tanba nee husi Igreja Katolika Korea nia parte sira agora servisu makaas ba ida nee, nee halo diskriminasaun ba 17 deit tanba sa mak 19 nee labele lori, tanba nee Igreja hakas aan mai koopera ho Governu Timor Leste, nunee bele hatoo lian ida nee ba Governu Korea.
Padre haktuir tan katak, nuudar Kreda labele foti desizaun atu lori ema sira nee ba Korea, maibe sira bele hatoo nia lian.
Nia afirma, kriteriu saida sei iha hela prosesu, agora sei iha hela kooperasaun entre Igreja Korea ho Governu Timor Leste, Primeiru Ministru ho Prezidente Republika neineik karik iha futuru sira bele book nafatin.
Padre dehan, amu sira iha Korea bele book nafatin governu rua nee hodi bele halo prosesu liu husi SEFOPE, bele fo dalan hodi lori trabalhador nia feen, laen ba iha Korea, ida nee problema neebe hotu-hotu hanoin mai koalia iha uma Prezidensia Republika.
iha biban nee, Prezidente Republika, Jose Ramos Horta Koalia ho delegasaun sira husi Korea atu servisu makaas hodi bele defende nafatin kona-ba direitu trabalhador sira nian iha Korea. Maibe, iha kualker tipu trabalhador hotu-hotu atu servisu oinsa mos sira nia dignidade ema nee importante.
Prezidente Republika nafatin hakas aan servisu hamutuk ho Igreja Korea nian, liu husi amu sira nee bele akompanha trabalhador sira hodi defende sira nia dignidade nuudar ema.
Jornalista: Emerenciana Pinto
Editor: Xisto Mendonça
