DILI, STLTIMORLESTE.com – Sekretariu Estadu Komunikasaun Sosial (SEKOMS) hakarak kriminaliza produtu jornalistiku, signifika viola ona lei inan Konstituisaun Republika Demokratika Timor Leste (KRDTL).
Kestaun nee hatoo husi Diretor HAK, Feliciano da Costa Aroujo ba jornalista sira iha salaun Hak, Farol, Tersa (12/08/2025).
Nia hatete, se SEKOMS hakarak kria lei atu kriminaliza libderdade imprensa, entaun viola ona lei inan KRDTL artigu 40-41.
“Hau hanoin atu hatete tan dala ida ita presiza refleta didiak ba ita nia konstitusional neebe iha artigu balun, neebe fo dalan ba ita liu-liu ba iha sosiedade para oinsa bele espresa sira nia hanoin, liu-liu buat balun neebe lalos sira bele hatoo iha neeba. Bainhira ami haree fila fali situasaun refere se ita hanoin atu bele kriminaliza situasaun ida nee, signifika halo violasaun ona ba Konstituisaun RDTL, “ dehan nia.
Nia hatete, temi lei inan maibe viola rasik lei inan, tanba nee husu labele halo buat hotu ho intensaun atu bele defende no proteze attitude no hahalok neebe tuir lolos viola.
Nunee mos Diretor FONGTIL, Velentim Pinto hatutan, se Prezidente Republika aprova atu kriminaliza liberdade imprensa parte hotu presiza halo asaun ruma labele nonok.
“Ita tenke hatene ita nia nasaun nee direitu demokratiku, entau ita tenke asegura didiak ita nia kualidade espresaun liberdade espasu siviku sira nee tenke mantein, jornalista hanesan elementu ida neebe bele promove ita nia kualidade espasu iha Timor, entau laiha oportunidade ida kria artigu ida neebe atu kriminaliza ita hanoin labele aseita ida nee,” nia tenik.
Nia hatutan, se aprova duni hotu-hotu presiza halo asaun ruma hasoru Governu, liu-liu ba SEKOMS, tanba Timor Leste opta hela direitu demokratiku.
(eme)
