DILI, STLTIMORLESTE.com – Kriteria halao rekrutamentu ba membru Polisia Nasional Timor Leste (PNTL) presiza iha balansu, nunee feto ho mane bele partisipa hotu.
Kestaun nee hatoo husi Peskizador AJAR, Inocencio Xavier ba jornalista sira.iha nia knaar fatin Farol, Dili, Kinta nee (06/02/2025) hatete, PNTL nee instituisaun estadu nia, tanba nee tenke garante profesionalidade no igualdade, proporsionalidade no igualidade nee iha reprezatasaun munisipais nomos reprezenta feto ho mane, nunee asegura PNTL nuudar forsa seguransa oinsa dezempenha nia funsaun hodi komprimenta ba konstituisaun no lei sira neebe vigor hela.
“Neebe hau hanoin instituisaun PNTL nuudar instituisaun estadu nia, presiza duni tau kriteria sira nuudar ezemplu ida ba organizasaun seluk, satan PNTL iha ninia lema neebe dehan atu kumpri lei no ordem no lei no ordem nee katak prosesu rekrutamentu tenke buka duni hatan ba prosedimentu legais sira neebe eziji iha kriteria rekrutamentu neebe iha tenke hadia, nunee iha reprezentasaun munisipais iha reprezentasaun feto no mane liu-liu igualdade jeneru nia, aleinde haree mos ema sira neebe kapaas joven neebe iha potensialidade bele projeta atus lima, atus haat ba ajente no atus ida hanesan ofisias polisiais nia,” katak nia.
Nia hatete, ida nee importante tebes, Komando PNTL inklui mos Ministeriu Interior atu haree estegmentu sira hodi haree mos esperiensia ano anterior, karik iha lakunas no dezafiu ruma buka aprende husi dezafiu sira nee bele melhora diak liu tan iha prosesu rekrutamentu.
Nunee mos Visi Diretor HAK, Antonino de Limas hatutan, HAK fo apoiu tomak kona-ba rekrutamentu ba membru foun PNTL no sujestaun mak presiza rekruta tau balansu.
“Ami nia sujestaun mak presiza rekruta tau balansu entre asuntu jeneru, katak tenke konsidera mos numeru feto diak liu tau numeru aas mos, se ita koalia asuntu balansu ba igualdade jeneru nee presiza tau konsiderasaun ba feto, tanba maluk feto sira mos iha kapasidade neebe hanesan, tanba nee tenke loke oportunidade hanesan ba feto ka mane no foinsae ho abilidade neebe sira iha,” katak nia.
Entretantu foin lalais mos fo sai ona katak IX Governu Konstitusional sei rekruta membru PNTL hamutuk 500 iha tinan 2025 nia laran.
(eme)
