DILI, STLTIMORLESTE.com – Publiku kestiona kona-ba Juiz Tribunal Primeira Instansia (TJPI) hola parte iha Juiz Konselheiru Tribunal Rekursu hodi foti desizaun ba rekursu neebe iha, maibe Prezidente Tribunal Rekursu deklara Juiz sira nee ba tanba iha baze legal.
“Ida nee akontese iha baze legal, tanba kuandu plenariu iha Tribunal Rekursu signifika katak Juiz sira neebe iha Tribunal Rekursu tenke tama hotu, maibe uma vez Juiz sira neebe iha Tribunal Rekursu impedidu no tesi hotu tiha ona, hau deside tiha hau labele ba deside nee tan nee labele ona, tenke iha solusaun legal,” dehan Prezidente Tribunal Rekursu, Deolindo Dos Santos ba jornalista sira iha Delta Nova, Segunda (28/04/2025).
Nia hatutan, se nain haat impedidu hotu ona, se ida mak desponivel nia tenke tama ho sira seluk, no sira seluk nee mai husi Primeira Instansia ho Juiz sira seluk neebe nia nomeasaun nee mai husi Konselhu Susperior Majislatura Judisial.
Tanba tuir Konstituisaun no tuir lei katak, KSMJ mak nomeia provizoriamente Juiz sira neebe inteira ba iha kazu ruma, depois sira bele ba kaer kazu nee hodi deside. Tanba nee laos PTR laos Prezidente Konsellu mak hili deit, maibe nee deliberasaun KSMJ mak hateten katak, Juiz ida nee mak bele tama ba iha prosesu ida nee, bazeia ba estatutu neebe regula Juiz sira mak hateten.
Iha fatin ketak, Jurista Sergio Dias Quintas dehan, iha sala kuandu PTR hasai diritiva hodi bolu Juiz Tribunal Judisial Primeira Instansia Dili.
“La sala ida wainhira PTR hasai diretiva hodi bolu Juiz Tribunal Primeira Instansia ba iha Tribunal Rekursu hodi foti desizaun, ida nee laos foin mak akontese iha tempu UNTAET no durante Tribunal eziste iha tinan barak nia laran servisu nee lao tiha,” dehan Sergio.
Nia hatutan, tuir Estatutu Majistradu Judisial Prezidente Tribunal Rekursu mak iha kompentensia hodi administra servisu sira iha Tribunal.
(ter)
