DILI, STLTIMORLESTE.com – Konfederasaun Sindikatu Timor-Leste (KSTL) husu IX Governu neebe lidera husi PM Xanana Gusmao, hasae salariu minimu nasional urjentemente ba servisu-nain Timor-Leste, neebe daudaun hasoru des-igualdade iha nivel istoriku kona-ba salariu minimu.
Lia-hirak nee hatoo husi Portavos KSTL, Frangelina Soares Aparicio liu husi press konferensia iha Edifisiu KSTL Bemori Dili, Tersa (29/4/2025).
Tuir Frangelina, loron mudial ba trabalhador neebe sei monu iha dia 1 Maiu 2025, KSTL ezije ba governu promove no investe ba programa traballu dignu iha politika governu nian. Tanba traballador sira nia perspetiva kona-ba traballu dignu nuudar sentru ba dezenvolvimentu social no ekonimia iha TL. Tanba evidensia iha mundu hatudu katak traballu dignu nuudar dalan ida neebe sustentavel atu aselera kresimentu ba produsaun no empregu hodi hasae tempu ou ritmu ba redusaun pobreza, harii demokrasia no koezaun sosial.
“Valor salariu minimu U$115, tuun kuaze 22% iha tinan 2021, nee bazeia ba rezultadu peskiza ILO kona-ba salariu minimu iha Azia Sudeste. Iha tempu hanesan inflasaun ba aihan no bebidas sae kuaze 60%. Bainhira kustu ba moris no inflasaun sae makas, sei hatun padraun moris servisu nain sira nian, servisu nain ka traballador vulneravel sira sei hetan risku ba moris iha kondisaun mukit no kiak nia laran,” katak Frangelino.
Tuir nia, traballu dignu bele akomoda aspirasaun ema hotu nian iha vida professional, traballu dignu sei envolve mos oportunidade atu hetan empregu neebe produtivu no sei fo rendimentu justu, hodi garantia siguransa iha servisu fatin.
Promove traballu dignu sei fo liberdade ba ema atu espresa sira nia preokupasaun, atu organiza no partisipa iha desizaun politika neebe afeita ba sira nia moris rasik. Hodi garantia ba oportunidade, no tratamentu neebe hanesan ba ema hotu iha nasaun ida nee.
Empregu persiza iha investimentu, nunee governu tenke aloka subsidiu ba investimentu privadu hodi maximiza impaktu ba empregu. KSTL husu investimentu apropriadu iha seitor konstrusaun, saude, agrikultura, turismo no seitor maritima, tanba seitor hirak nee importante atu kria empregu neebe estavel.
Orsamentu husi governu tenke alina ho programa kriasaun empregu no Estratejia Empregu Nasional (NES), nunee governu fo insentiva no kapasitasaun ba seitor ekonomia informal.
Iha fatin hanesan Visi Prezidente KSTL, Serafico Natalino Soares dehan, wanhira governu la halo mudansa ba salariu minimu KSTL hamutuk ho trabalhador sira iha setor hotu-hotu sei eziji ba governu hodi halo mudansa ba lei. Tanba ezijensia KSTL nia nee klaru ona firme nafatin ate governu ida nee estabelese lei salariu minimu neebe la kondisiona ho situasaun neebe agora daudaun iha ita nia rai hasoru inflasaun fulan-fulan sae hela deit, fos no sasan nesesidade basiku kuaje sae hotu. Maibe salariu minimu nafatin estake iha nia fatin deit kada fulan.
(est)
