DILI, STLTIMORLESTE.com – Tempu Kuarezma tenke tau moris tomak iha Maromak, wainhira hamutuk ho Maromak sei la monu bá diabu nia bábeur, firmi nafatin hodi reza no halo orasaun bá Maromak, halo Maromak sai sentru iha ema idak-idak nia moris.
Liafuan murak nee haktuir husi Padre Selebrante Joao Roque liu husi nia omilia, bainhira prezide misa eukaristia iha Igreja Nossa Senhora de Grasa Tasi-Tolu, Domingu (22/02/2026).
Pe. Joao dehan, tempu kuaresma nee sarani sira tenke reza no halo orasaun firmi ba Nai Maromak, halo Nai Maromak sai sentru iha moris tomak atu nunee labele monu bá bábeur diabu nian.
Liturjia sira ohin koalia kona bá tentasaun diabu nian neebe tenta bábeur ema monu bá nia lasu, hodi lakon Nai Maromak nia Grasa.
Hanesan Adao ho Eva, ema primeiru neebe Nai Maromak halo uluk tuir Nai nia ilas. Maromak halo no kria buat hotu-hotu mesak furak, neebe sira sente haksolok no kontenti hela deit, sira la sente triste. Maromak fo buat hotu-hotu bá sira, maibe iha mos limitasaun.
Iha nee diabu mos hatene Maromak bele fo buat hotu-hotu maibe labele kona ida limitasaun nee. Iha neemak diabu mos oferese alternativu ida bá ema, tanba diabu hatene Maromak fo buat hotu-hotu, maibe labele kona ida nee.
“Iha nee santanas mai tenta hodi dehan Maromak fo liberdade bá imi no fo buat hotu bá imi, los ka lae. Eva dehan, sim maibe Maromak dehan labele kona no han aifuan ida nee. Ida nee diabu aproveita oportunidade nee dehan, lae Maromak bosok imi, imi koko tok han aifuan nee, imi sei matenek liu Maromak. Entaun ho ida nee diabu fo bá ema, no Eva mak simu uluk hodi fo tutan bá Adao, no bainhira sira han aifuan nee sira matan nakloke, sira la hatais buat ida, sira moe no senti sala halai bá subar husi Maromak. Antes han aifuan nee, sira la hatene moe. Maske sira subar aan, maibe Maromak hatene sira. Bainhira Maromak bolu sira, Adao mak hatan uluk, no Maromak husu bá sira tanba sa imi subar. Nunee Adao hatan, hau moe no sala tanba han aifuan, no Nai Maromak husu bá Adao semak fo o Han, Adao hatudu bá Eva no nunee mos Eva dun bá samea. Iha neemak monu bá babeur diabu nian, ema la hatene firmi, nunee bainhira diabu tenta monu kedas,” dehan nia liu husi omilia.
Nia afirma, ida neemak ema nia frakeza, diabu hatene frakeza sala no aporveita kedas, bainhira la kuda sentru Maromak iha moris.
Nia dehan, iha Jesus nian bainhira halo jinzun hamlaha, diabu aproveita kedas koko, maibe Jesus firmi nafatin, Nia fiar ann Maromak Nia oan. Diabu Soe lasu Nia la monu, maibe ema diabu soe lasu bá monu kedas.
“Ita ema diabu soe lasu bá, ita monu kedas. Tanba nee bainhira tentasaun mosu, halo ema monu kedas ba lasu. Tentasaun sira nee mosu bainhira mane kontra feto halo violensia, violensia kontra labarik no baku labarik sira, la respeitu malu, buat sira neemak tentasaun sei mosu,” dehan Amu selebrante nee.
Nia haktuir, iha segundu leitura, Sao Paulo dehan, tanba ema ida nia sala tun mai ema hotu mak Adao. Nia mak ema primeiru Maromak kria lakon ona Maromak Nia Grasa. Maske nunee maromak Nia Domin bá ema nee boot tebes, hodi haruka Nia Oan Jesus mai iha mundu atu salva ema.
“Jesus mos hasoru diabu babeur hewain, maibe Jesus hanesan iha novo testamentu dehan Adao foun, Adao tuan mate. Adao foun mak Jesus neebe mai lori salvasaun ba ema hotu Nia sala. Jesus iha rai fuik maran halo orasaun no Jejum neebe iha relasaun ho Maromak. Diabu hatene ida nee Jesus hodi koko dehan, o Maromak nia oan halo tok fatuk nee nakfilak bá paun. Iha nee Jesus la hatudu nia frakeza bá diabu nee hodi babeur Nia, Jesus la monu bá lasu. Too fali iha toree diabu koko dehan o Maromak oan haksoik tok, maibe Jesus la monu bá lasu tanba Nia fiar Aan Maromak Nia oan. Too fali iha foho aas atu adora diabu, maibe Jesus la monu bá lasu tanba adora nai Maromak ida deit mak nia aman, sei la adora diabu.
Tanba nee iha tempu kuaresma nee husu sarani sira atu halo buat 3 mak orasaun bá Nai Maromak, Reza bá familia no komunidade, tuir fali zinjun no abstensia no ikus halo karidade. Tempu kuaresma nee husu atu halo reflesaun liu husi hahalok iha moris loron-loron nian.
Jesus wainhira halo hela orasaun no jinzun bá Aman Maromak iha raifuik maran, diabu tenta bábeur Nia, maibe Jesus la monu bá lasu. Fiar nafatin bá maromak, firmi nafatin bá Jesus Nai Maromak tenke sentru iha moris tomak. Iha kuaresma lori krus hamutuk ho Jesus, sei hahu moris hias fali iha Domingo resurreisaun.
(dom)
