DILI, STLTIMORLESTE.com – Jerasaun Patriota, Januario de Oliveira Martins hatete, kustume lia mate no lia moris nee mai kedas iha beiala sira nia tempu, maibe agora lia nain sira halo fali mudansa boot, bainhira halo lia mate lia moris hakas fetosan no uma mane sira ain la kona rai, ida nee atu impata ema nia jerasaun sira nia futuru, susar atu asesu ba nivel edukasaun.
Tanba osan atu fo oan ba eskola mak halo hotu ona ba lia, tan servisu hodi nee halibur osan lori tempu neebe naruk, maibe lia mate no lia moris hakas mai hasai dala ida, dala ruma osan neebe halibur durante tinan barak nia laran nee, rai ba mos la too, tanba lia nain sira hakarak tarjetu nee.
“Dala ruma ita laiha kbiit, maibe kultura nee mai transforma fali ita hanesan explorasaun ida, tanba nee ita tenki kria duni lei ida hodi regula, tan dala ruma inan aman sira atu haruka oan ba eskola dehan osan laiha, maibe lia mate no lia moris mai, sira sosa karau ho folin US$ 500 ba leten nee ba sira lalais loos , mas atu dudu oan ba eskola, dehan osan laiha, tan nee sistema sira nee ita tenki halo duni lei hodi regula,” dehan Januario ba STL, iha Villa Verde, Dili, Kuarta (28/01/2026).
Tuir nia iha munispiu balu estabelece tiha ona tara bandu, maibe la hatene sei lao ka lae, tanba liu husi tara bandu maka bele halo redusaun ba oho animal, realidade kultura kontinia buras iha tempu bai loron. Tanba nee tenki kria duni lei hodi regula.
Iha parte ketak, Observador Politika, Antoninho de Oliveira hatete, atu kria lei ou lae, nee fila fali ba inisiativa husi governu no Parlamentu Nasional. “Hau hanoin prezisa duni lei atu regula lia mate ho lia moris, maski prosesu tara bandu lao ona, maibe konsidera ladun todan, tanba nee lia iha Munispiu sira nee lao laiha rohan, liu liu iha tempu bai loron,” hatete Antoninho.
(car)
