BAUKAU, STLTIMORLESTE.com – Prezidente atual Konselhu Munisipal Kombatentes Libertasaun Nasional (KMKLN) Baukau, Cornelio Gama “L7” ho vizaun hamutuk 3 atu realiza iha inisiu mandatu.
Deklarasaun nee hatoo husi Prezidente KMKLN Baukau, Cornelio Gama “L7” ba jornalista sira bainhira halao servisu loron dahuluk nian iha knaar fatin edifisiu KMKLN Vila Antiga Baukau, Tersa (06/01/2026).
“Koalia kona-ba primeiru mandatu vizaun mak primeiru ita atu rezolve problema ita nia Komadante Xanana seidauk simu medalha no Ologari seidauk simu, segundu vizaun ita tenke haree saudozu sira uluk hanesan Sahe neebe agora 24 anos iha deit uma, terseiru vizaun prinsipalmente tenke haree oan sira nia eskola,” dehan L7
Nia fo razaun, atual Xefe IX Governu Konstitusional Kay Rala Xanana Gusmão uluk iha tempu rezistensia nuudar Komadante Em Xefe FALINTIL lidera prosesu funu too ukun aan, maibe iha prosesu ukun aan seidauk simu medalha kondekorasaun hanesan nia maluk luta nain sira seluk. Aleinde mos Komadante Ologari neebe too ohin loron seidauk simu medalha kondekorasaun hanesan nia maluk luta nain sira seluk. Tanba nee hakarak atu solusiona liu husi halakon kauza sira neebe fo perturba ba prosesu sira.
Nunee mos L7 katak, hanesan Prezidente KMKLN Baukau sei la nonok ba restu mortais saudozu”Sahe” halo ona tinan 24, maibe nia ruin seidauk haloot iha jardim dos herois sira neebe estabelese iha territoriu Timor Leste, tanba nee sei koordena ho parte familia saudozu hodi solusiona problema refere hodi fo mahon saudozu kontinua tulun ba Timor Leste iha prosesu dezenvolvimentu.
Vizaun ikus mak atual Prezidente KMKLN Baukau kompromete sei kore veteranus nia oan sira husi problema analfabetu, tanba durante prosesu luta ba libertasaun nasional, veteranus barak la eskola too Timor ukun aan afeta mos ba nia oan sira neebe barak la inklina aan iha prosesu aprendizajen sira iha nivel eskola publiku no privadu, no sei koordena ho Nasional hodi fo bolsu estudu ba veteranu oan sira neebe daudaun seidauk remata nia estudu sira.
“Maibe ita primeiru haree ba asaun kultu prazu no longo prazu kuandu tinan 5 nee vizaun 3 nee too fim mak la hotu sei entrega ba terseiru etapa mai, komu nee laos partidu atu hatun malu hasae malu, maibe nee FALINTIL nain ba nasaun tenke respeita buat sira nee hotu, buka meius rezolve problema sira nee hotu labele mosu konflitu ruma hanesan uluk liu ba nee,” L7 akresenta.
Entretantu fo hanoin fali ba publiku katak, Cornelio Gama “L7” eleitu nuudar Prezidente KMKLN Baukau liu husi Kongresu Konselhu Kombatentes Munisipal hafoin kompete Prezidente KMKLN Baukau sesante Fernando “Beredu’u” Gusmão iha tinan 2025.
Jornalista: Tomas Reis
