DILI, STLTIMORLESTE.com – Jurista Timor oan konsidera katak, tuir normas neebe iha kuandu desizaun husi Tribunal Primeira Instansia la konkorda bele halo rekursu, tanba desizaun Tribunal Primeira Instansia laos desizaun ikus.
“Tuir norma prosesual bainhira parte ida tantu arguidu ka Ministeriu Publiku la aseita desizaun Juiz nian iha primeira instansia sira bele halo rekursu,” dehan Jurista Sergio Dias Quintas ba STL iha Kaikoli, Kuarta (14/01/2026).
Tuir nia, prazu rekursu konta husi notifikasaun neebe parte sira simu, maibe wainhira Juiz le leitura sentensa iha julgamentu no esplika katak, prazu sura kedas husi Juiz le leitura sentensa, entaun prazu rekursu loron 30 nia laran, karik rekursu la hatama tuir prazu sei konsidera parte sira simu ona desizaun.
Sergio dehan, rekursu hatama iha Tribunal Primeira Instansia pois mak envia ba iha Tribunal Rekursu, karik defeza mak hatama rekursu uluk ba Tribunal entaun Tribunal tenki notifika ba Ministeriu Publiku hodi halo resposta ba rekursu tuir artigu 302 husi Kodigu Prosesu Penal.
Iha fatin ketak, Akademiku UNTL, Rafael de Jesus dehan, halo rekursu mak dalan neebe lei fo, atu hatoo hikas ita nia faktus foun.
“Se la simu desizaun dalan diak mak halo rekursu, se ita kritika deit la iha solusaun, ida nee lei mak hateten,” dehan nia.
Informa tan, Tribunal sira halao knaar tuir lei haruka, tanba nee publiku sira neebe asesu ba iha justisa tenke lao tuir lei haruka atu hotu-hotu bele hakruk ba lei neebe iha.
Tuir observasaun STL nian, kazu barak mak desizaun Primeira Instansia sai, parte sira la konkorda halo rekursu. No iha kazu balu ikus mai Tribunal Rekursu deside halo re julgamentu no balu mos Tribunal kontinua mantein desizaun Tribunal Primeira Instansia nian.
(ter)
