DILI, STLTIMORLESTE.com – Bolsa kandidatu profesores neebe antes nee koloka ona ba Munisipiu Ainaro, maibe nain haat (4) husu atu muda fatin hanorin ba fali munisipiu seluk no Servisu Edukasaun Munisipiu Ainaro la fo autorizasaun.
Patricio da Costa Magno hanesan Diretor Servisu Edukasaun Munisipiu Ainaro hatoo asuntu nee ba jornalista STL liu husi telefone, Kinta nee (10/07/2025).
“Balun husu atu muda fatin, maibe ita la fo tanba Ministra Edukasaun hasai ona lei ida, ita labele fo muda ema ona. Iha fulan ida ou rua ba kotuk ita nian profesores nain haat mak husu atu muda fatin hanorin ba fali Dili no Suai, maibe hau la fo ona sira, nain 1 husu atu muda ba fali Suai no nain 3 seluk husu atu muda ba fali Dili, maibe ita la autoriza sira atu muda, tanba karta despaisu husi Ministra sai tiha ona,” nia deklara.
Nia dehan, komunidade oferese fatin ba sira nee eskola rua deit mak komunidade fasilita hela fatin ba profesores sira, durante nee profesores sira hatoo deit katak sira aluga komunidade nia uma, balun komunidade sira mak fo fatin ba sira hela, balun la toman iklima moras, maibe nee uluk, agora sira la hatoo buat ruma, liu-liu kona-ba sira nian hela fatin.
(eme)
