DILI, STLTIMORLESTE.com – Polisia Nasional Timor Leste (PNTL) liu husi Diresaun Tranzitu Seguransa Rodaviario Nasional husu komunidade sira iha kapital Dili labele taka dalan publiku bainhira laiha autorizasaun husi Polisia Tranzitu (PolTranz).
Diretor Diresaun Tranzitu Seguransa Rodoviária Nasional (DTSRN), Superintendente Assistente Polísia, Luis da Costa hatete, dala barak lia mate no lia moris mak ema balun haknaar aan ezerse nia poder atu taka dalan publiku.
“Ita nia lia barak liu nee lia mate no lia moris, ita hatene katak poder atu autoriza hodi uza estrada publiku nee so PolTranz ho diresaun transporte nian deit, maibe ita haree xefe aldeia bele autoriza, xefe juventute iha bairo mos bele autoriza, xefe suku mos bele autoriza, ida nee mak hamosu problema,” hateten Diretor Diresaun Tranzitu Seguransa Rodoviária Nasional (DTSRN), Superintendente Assistente Polísia, Luis da Costa ba jornalista sira iha Balide, Kinta (03/04/2025).
Xefe Tranzitu nee afirma liu husi Konferensia ida atu avizu ba ema hotu liu-liu autoridade lokal sira atu bele ezerse sira nia kompetensia neebe mak tuir lei haruka.
Nia hatete, karik hatene dalan publiku tenke halo karta no minimu tenke informa ba OPS sira, bele halo koordenasaun ba iha Seksaun Tranzitu Seguransa Rodaviario Munisipiu Dili no hetan aurizasaun mak foin bele taka, labele kualker ema ida naran taka deit.
“Labele Xefe Suku ida autoriza taka ona dalan, nee la bele, tanba laos autoridade nia kompetensia,” hateten nia.
Nia hatete, bainhira naran taka deit estrada publiku bele prezudika hodi halo engarrafamentu, nunee tenke fo konhesimentu ba Polisia Tranzitu.
Tanba nee, Diresaun Tranzitu Seguransa Rodaviario Nasioanal husu autoridade lokal sira atu ezerse didiak sira nia kompetensia neebe mak lei atribui ona.
(EST 3)
