DILI, STLTIMORLESTE.com – Prezidente Republika (PR) nomeia Nelson de Carvalho hodi asumi kargu hanesan Prokurador Jeral Republika, tanba nee jurista konsidera merese hodi simu knaar nee.
“Antes Dr Nelson sai Prokurador Jeral Republika, nia mos sai Adjuntu Prokurador, hau hanoin nia figura ida neebe ita bele dehan katak merese tanba nia mai ho begraun Adjuntu Prokurador nia mos Prokurador kareira neebe mak tuir hau nia konhesimentu nia mos Prokurador Primera klase, hau la duvidas kona-ba nia kapasidade, nia prienxe rekejitus,” dehan Jurista Sergio Dias Quintas ba jornalista sira iha Kaikoli, Tersa nee (13/05/2025).
Nia hatutan, hein nia mandatu tinan haat atu halo saida, no espera nia bele dezenvolve Instituisaun Prokurador livre diak liu tan, em termus aumenta numeru Prokurador nian, formasaun no kapasitasaun ba iha ajente MP kontinua lao.
Sublina, ida mak MP defende legalidade defende no salva osan estadu nian, tanba MP nuudar titular ba asaun penal, haree iha indisiu ruma kona-ba krimi korupsaun Pekulatu Administrasaun Danoza bem protejidu ekonomia nasaun nian, MP mak tenke defende didiak krimi sira nee.
Reforsa, prienxe kriteira maibe seidauk too, importante labele defende deit interese grupu nian, maibe defende interese Estadu nian.
Ezemplu ema neebe pratika korupsaun liu-liu Governante sira kaer ukun nee, karik sira iha indisiu ruma kona-ba krimi korupsaun pekulatu abuzu poder administrasaun danoza, espera Dr Nelson labele halimar, karik pratika krimi tenke prosesa ba iha Tribunal. Tenke salva osan estadu liu husi MP nia asaun penal, se mak pratika krimi tenke prosesa no julga iha Tribunal.
Iha fatin ketak, Akademiku UNTL, Sebastiao Dos Santos dehan, simu knaar neebe foun halao servisu tuir lei haruka.
“Ita tau konfiansa ba iha Prokurador foun, no espera bele halao knaar tuir promesa neebe iha atu haree se deit mak komete krimi, labele husik deit, tenke investiga hodi lori ba iha Tribunal liu-liu sira neebe utiliza osan Estadu nian la tuir nia dalan,” dehan nia.
Hatutan tan, hanesan Timoroan halao knaar neebe fo konfiansa ba tuir lei haruka atu labele hamosu duvidas iha publiku nia leet.
(ter)
