DILI, STLTIMORLESTE.com – Tribunal Judisial Primera Instansia Dili (TJPID) halao julgamentu ba arguidu ho inisial GM, tanba komete krime hasoru lezada MCJ.
Tuir faktus katak, iha loron 24 fulan Julhu tinan 2022 iha Bekora, momentu neeba arguidu hamutuk ho nia kolega sira hemu hela tua.
Lezada mos hakbesik ba iha arguidu atu husu osan ba sosa modo, maibe arguidu la fo ida.
Depois mosu diskusaun entre arguidu no lezada, arguidu lori liman baku lezada, tanba nee lezada mos foti kanuru suru rai ida, hodi baku ba iha arguida nia liman.
Konsekuensia husi arguidu nia hahalok, halo lezada sente moras hodi ba hatoo keixa iha polisia.
Arguida halo ho forma livre, hatene hela katak nia hahalok nee lei bandu maibe halo nafatin.
Tanba nee, Ministeriu Publiku akuza arguidu komete krime Violensia Domestika ho Forma Ofensa Integridade Fisika Simples, neebe previstu iha artigu 145 husi Kodigu Penal, konjuga ho lei Violensia Domestika numeru 07/2010 loron 07 fulan Dezembru.
Hatan ba faktus nee, arguidu deklara katak, mosu problema tanba arguidu lakohi fo osan ba lezada kaer. Arguidu deklara nia servisu hanesan badaen, momentu neeba tempu seidauk to atu foti osan, depois lezada husu osan ba arguidu no arguidu ho kondisaun lanu, tanba nee maka arguidu mos baku lezada.
Arguidu deklara, depois problema mosu sira rezolve tiha no hahu husi neeba mai too agora sira la iha tan problema ona. Arguidu rekonhese aktu neebe nia halo foin dala ida, tanba nee arepende ba aktu nee.
Lezada mos konfirma tan katak, arguidu hanesan nia laen. Momentu neeba arguidu hamutuk hela ho nia kolega sira hemu tua, tanba nee mak lezada hanoin katak, osan atu sosa tua ba hemu diak, nusa la fo osan ba lezada hodi ba sosa modo.
Lezada deklara tan, depois lezada hamriik besik ba iha arguidu husu osan atu ba sosa modo, maibe arguidu fo deit osan 50 sentavos. Ho ida nee lezada la simu, lezada dada arguidu nia liman hodi lori arguidu ba iha sira nia uma, too iha uma mak mosu diskusaun.
Lezada deklara, iha diskusaun nee arguidu tuku lezada iha lezada nia kanuruk halo lezada monu tun ba rai no sente oin nakukun kedan, depois maka lezada foti fali kanuru suru rai nian ida baku ba arguidu kona iha liman.
Lezada rekonhese, depois akontese tiha problema sira diak malu fali.
Rona tiha arguidu no lezada, iha alegasaun Ministeriu Publiku husu Tribunal atu aplika pena multa ba arguidu.
Enkuantu husi parte defeza arguidu nian, Manuel Amaral deklara, arguidu konfesa imparsial ba faktus, tanba nee husu Tribunal fo pena neebe adekuadu tuir konviksaun Tribunal nian.
Rona tiha alegasaun, Tribunal adia ba loron seluk hodi rona desizaun.
Audensia julgamentu nee prezide husi Juiz Jose Maria, Ministeriu Publiku reprezenta husi Prokuradora Estajiada, arguidu hetan asistensia legal husi Defensor Publiku Manuel Amaral.
(ter)
