BAUKAU, STLTIMORLESTE.com – Sosiedade Sivil sei hasoru Autoridade Munisipiu Baukau, bainhira projetu reabilitasaun estrada urbana Baukau Vila la halo lansamentu fatuk dahuluk iha Novembru tinan nee.
Koordenador Asosiasaun ONG Baukau, Crispin Malik hateten, kondisaun estrada iha Baukau Vila diresaun husi Vila Antiga ba Vila Nova no kontinua too iha area Nagardjo Uainiki daudaun difikulta movimentu komunidade sira ho transporte publiku no privadu, tanba kondisaun aat, maibe liu husi publikasaun informasaun husi Autoridade Munisipiu Baukau governu atu responde kondisaun estrada Baukau Vila ho tipu reabilitasaun neebe atu akontese iha Novembru nee, maibe Novembru atu besik remata ona seidauk iha implementasaun fatuk dahuluk ba reabilitasaun estrada refere.
“Ami iha programa advokasia sei halo mudansa sifnifikativu ba iha politika nia desizaun, se desizaun nee la implementa nuudar Sosiedade Sivil sei husu, tanba sa mak hanesan nee ita sei rona. Se fulan ida nee mak halo ita boot sira hein deit Sosiedade Sivil sei hatoo buat ruma ba ita nia Prezidente Autoridade Munisipal para ita bele hetan nia rajaun ruma,” Crispin Malik hateten ba jornalista sira iha Vila Nova Baukau, Kinta (20/11/2025).
Nia komenta, planu Sosiedade Sivil iha Munisipiu Baukau atu hasoru Prezidente Autoridade Munisipiu Baukau, tanba antes nee informa ona ba publiku katak, lansamentu fatuk dahuluk ba projetu reabilitasaun estrada urbana Baukau Vila hahu iha fulan Maiu 2025, maibe la realiza no informa daruak lansa iha fulan Novembru nee, maibe nafatin seidauk.
Nunee liu husi politika Sosiedade Sivil iha Munisipiu Baukau sei hasoru Prezidente Autoridade Munisipiu Baukau hakarak atu hatene kauza ba lansamentu fatuk dahuluk, tanba iha Munisipiu seluk liu liu iha area urbana kondisaun estrada diak, enkuantu iha Baukau Vila kondisaun estrada aat.
Enkuantu Diretor Asosiasaun Unidade Feto ba Dezenvolvimentu, Bendita de Jesus Amaral sente preokupadu ho kondisaun estrada urbana Baukau Vila, tanba kondisaun aat, maibe iha fulan hirak liu ba Governu kontratu kompanhia lokal balu halo ona manutensaun ba estrada refere liu husi tipu cor ho sementi no projetu refere seidauk finaliza Autoridade Munisipiu ho nia politika hapara kompanhia implementador, tanba rajaun antisipa gastu orsamentu dobru ka dupla. Nunee hapara projetu cor ho sementi atu implementa hikas ho tipu reabilitasaun, maibe too ohin loron programa lansamentu fatuk dahuluk seidauk akontese mezmu Prezidente Autoridade Munisipiu Baukau rasik informa ona iha publiku atu lansa iha Novembru nee.
“Ita nia Prezidente Autoridade Munisipiu informa ona iha publiku katak atu halo lansamentu ba estrada ida nee atu rehabilita estrada ho kualidade diak maibe realidade ohin loron seidauk realiza, ita la hatene osan mak seidauk iha ka ou tempu mak seidauk iha atu realiza estrada ida nee. Hanesan Organizasaun Feto senti triste ita nia estrada kondisaun hanesan nee,” Bendita hateten.
Nia komenta, Asosiasaun Feto Baukau sente triste ho kondisaun estrada iha Baukau Vila, tanba kondisaun estrada sorin diak no sorin kondisaun aat iha neebe fo impaktu tebes ba komunidade sira nia movimentu ho transporte publiku no privadu.
“Nee fo impaktu tebes ba komunidade, tanba udan monu rai susar tebes ita nia komunidade ba halo tratamentu saude estudante sira neebe asesu edukasaun inklui ita nia inan vendedor sira liu liu ema ho difisiensia, tanba risku mirkrolete sei paradu haree ba medan tauk halai buka penumpang tanba bele estraga sira nia kareta,” Bendita argumenta.
Tuir Diretora nee katak, kondisaun estrada urbana Baukau Vila daudaun nee diresaun husi rotunda Vila Nova too iha area Nagardjo Uainiki maioria kondisaun aat no kuak, iha neebe tempu udan kauza udan been nalihun difikulta transporte publiku no privadu halo movimentu, tanba nee bainhira udan boot akontese posibilidade transporte publiku no privadu sira sei labele halo movimentu, tanba razaun motorista no kundotor la hetan dalan.
“Rekomenda hela ba parte relevante atu halo lalais estrada sira nee, rehabilita karik rehabilita ona ba, karik halo konstrusaun foun entaun bele aselera ona ba atu nunee bele fasilita ba ita nia komunidade sira,”
Entretantu antes nee Prezidente Autoridade Munisipiu Baukau Veneranda Lemos informa ona katak, projetu rehabilatasun estrada urbana Baukau Vila sei lansa fatuk dahuluk iha fulan Maiu 2025, maibe la konsege, tanba iha kestaun tekniku neebe prezisa hadia, maibe iha loron 28 Outobro 2025 Prezidente Autoridade Munisipiu Baukau nee informa hikas ba publiku sei fatuk dahuluk ba projetu refere sei lansa iha fulan Novembru, maibe too ona loron 20 Novembru seidauk realiza.
Too notisia nee publika STL seidauk hetan komfirmasaun husi Prezidente Autoridade Munisipiu Baukau no bainhira atu halo komfirmasaun, Prezidente laiha fatin, tanba iha hela Dili tuir enkontru importante balu.
Jornalista: Tomas Reis
Editora: Domingas Gomes
