DILI, STLTIMORLESTE.com – Diretor Nasional Kontrolu Poluisaun (DNCP – sigla português), Arlindo Silveira dehan, lixu plastiku fo impaktu ba ema nia saude no fo mos impaktu ba ambiente, se wainhira la halo tratamentu diak mak sei estraga ambiente no paisajen sira.
Lia hirak nee hatoo husi DNCP, Arlindo Silveira ba jornalista sira iha Bidau Santana, hafoin partispa iha worksop ho nia tema “Programa Banku de Lixu”,(23/11/2025).
“Ita la halo tratamentu neebe diak ba lixu, nia sei estraga ambiente no paisajen iha tasi ibun sira, no fatin turistiku sira neebe oras nee daudaun ema hotu konsentra ba iha tasi ibun sira hodi halo paseiu,” dehan nian.
Nia esplika, Timor Leste (TL) tama ona ba membru ASEAN presiza kria kondisaun neebe mak dignu, nunee bele atrai ema hotu nia matan hodi mai vizita fatin turistiku sira.
“Ita tama ona ba membru ASEAN presiza mos kria kondisaum neebe mak diak, atu nunee bele atrai ema seluk mai iha rai laran, fatin turizmu neebe mak diak ita hotu kontribui atu nunee lixu sira nee tau iha idak-idak nia fatin,” nia tenik.
Nia mos husu ba komunidade sira hotu neebe mak besik tasi ibun, daudaun nee ita tama ona ba politika ekonomia azul, presiza tau atensaun ba lixu plastiku, liu-liu ba iha biodiversidade sira iha tasi laran, dala ruma sofre husi atividade ema nian.
Iha fatin hanesan, Prezidente Komisaun Organizador ArtEmpreender, Natalino Fernandes Ximenes hatutan, objetivu prinsipal husi workshop nee hakarak atu kria oportunidade ba joven sira, no hanesan mos organizasaun ida neebe inisiativa atu promove setor kultura turizmu no ekulturiz.
“Ami iha kreatividade lubuk ida neebe mak halo, iha parte arte ami mos hanoin katak hanesan organizasaun ida neebe inisiativa atu promove setor kultural no arte nian,” tenik Natalino.
Nia fundamenta, Governu investe ona fatin neebe furak, maibe labele furak too deit iha nee, maibe tenke hamoris liu husi kreatividade sira.
“Ami haree Ministeriu Turizmu no Ambiente (MTA) iha IX Governu Konstitusional nee mak ami halo proposta ida atu hatan katak ami iha inisiativa, Govenru investe ona fatin sira nee furak ona, maibe labele furak hanesan nee deit, maibe ita tenke halo moris ho kreatividade,” katak nia.
Enkuantu festival nee realiza iha 21 Novembru tinan nee, no iha oportunidade sei iha tan faze segundu iha fulan Dezembru, nunee Festival Ekoturiz nee husi Ministeriu Turizmu Ambiente apoiu US$ 17.200 ital.
Jornalista: EST 1
Editor: Xisto Mendonça
