DILI, STLTIMORLESTE.com – Ministeriu Publiku (MP) deside hodi arkiva prosesu Diretor Jeral Servisu Korporativa Ministeriu Agrikultura, tanba konsidera la iha indisus neebe forte.
“Iha prosesu numeru 00424 KAK TL, razaun tanba saida mak Ministeriu Publiku halo arkivamentu, primeiru katak la iha indisus forte katak RSG la iha indisus katak, pratika krimi imputa ba nia liu-liu krimi korupsaun pasiva ajente publiku ho aktu ilisitu,” dehan Defensor Publiku, Fransisco Martins ba jornalista sira iha Tribunal Dili, Kuarta nee.
Nia hatutan, depois KAK halo investigasaun haruka ba iha Ministeriu Publiku, no Ministeriu Publiku hanesan nain ba asaun penal deside la iha provas no la iha indisus ida neebe forte hodi kontinua prosesu nee ba oin.
Ministeriu Publiku iha lejitimidade atu ordena arkiva ba prosesu nee, banhira sira indentifika katak, la prienxe ba elementus krimi, ho ida nee MP iha loron 28 fulan Fevereru tinan 2025 arkiva prosesu nee, hodi hatun despaisu arkivamentu.
Buska neebe KAK halo iha momentu neeba, deskonfia RSG hanesan Diretor Jeral pratika krimi korupsaun pasiva ho aktu ilisitu, hodi KAK liu husi mandadu Tribunal halo buska ba iha Ministeriu Agrikultura Floresta Peska, no nia kuntinuidade ba iha arkivamentu.
Hatan kona-ba ba oin sei halo buat ruma hodi husu naran diak, nia parte dehan, tenke identifika lai tanba maioria forsa husi media sosial keixa nee mai husi se, se duvidas ho situasaun sira nee. Se RSG halo keixa hasoru ema sira nee karik, husi defeza seidauk hatene nia prosesu investigasaun, se identifika ona se mak hatoo keixa nee, bele halo asaun hasoru ema nee, seidauk serteza ema neebe halo keixa hasoru nia.
Sasan neebe buska foti nee, dokumentus publiku Estadu nian no sasan privadu hanesan leptop no kamera ida, maibe sira devolve fila fali ona objeitu prendidu sira nee ba iha nia nain.
Tanba momentu neeba Funsaun Publiku hasai karta hodi suspende tiha RSG husi nia kargu hanesan Diretor, depois husi parte defeza hatama fali prosesu kontesiozu impugnasaun ba aktu judisial no Tribunal deside RSG la sala no retoma fali nia knaar hanesan Diretor Jeral. Maibe kona-ba situasaun sira nee, prosesu administrativu kabe ba iha instituisaun defende ba iha konfiansa.
Antes nee iha loron 17 fulan Setembru tinan 2024 KAK halo identifikasaun ba Diretor Jeral Servisu Korporativos RSG, nuudar suspeitu neebe iha indikasaun katak, fahe projetu ba kompanhia sira no hetan benefisiu husi projetu kanalizasaun irigasaun iha Maliana, no preojetu konstrusaun moru protesaun iha karantina ba plantas iha Batugade neebe mensiona ho Media Sosial.
Rezultadu investigasaun husi KAK konklui katak, la iha indisus krimi ba implementasaun projetu konstrusaun moru karantina peska neebe implementa husi kompanhia LELIANA Unip iha Bobonaro.
Nunee, rezultadu investigasaun husi KAK mos konklui katak la iha indisus no provas neebe sufisiente atu konstitui suspeitu RSG sai arguidu ba iha kazu ida nee.
Hafoin halo analiza kritiku ba faktus provas hirak neebe konsta iha autus, Prokurador Titular konklui no fundamentu katak, prosesu refere ordena atu arkiva autos haktuir artigu 235 numeru ida no rua husi Kodigu Prosesu Penal.
Antes nee KAK ezekuta deit mandadu Tribunal, hodi halo buska ba dokumentus balu, tanba deskonfia ba projetu ba amigu.
No KAK halo deit buska investiga no kompleta deit dokumentus, hafoin submete ba iha Ministeriu Publiku hodi haree, akuza ka arkiva ida nee kompetensia MP nian.
(ter)
