DILI, STLTIMORLESTE.com – Tribunal Judisial Primeira Instansia Dili liu husi leitura akordaun deside absolve arguidu ho inisial RS hanesan Konselhu Polisiamentu Komunitaria (KPK), tanba konsidera la iha provas sufisiente kona-ba halo rahun vidru janela Postu Polisia Manleuana.
Iha sala julgamentu laran loron Kinta (24/04/2025) Juiz Prosesu Afonso Carmona deklara katak, Tribunal absolve arguidu tanba la iha provas neebe sufisiente hodi hatudu katak, arguidu mak lori fatuk tuda vidru eskuadra polisia nia rahun.
Tribunal haree iha sala julgamentu laran arguidu nega ba faktus, no sasin DSSX hanesan membru PNTL mos deklara katak, sasin la haree ho matan se mak tuda vidru rahun. Tanba nee Tribunal tetu la iha provas sufisiente kondena arguidu, hodi ikus mai deside absolve arguidu husi instansia.
Antes nee, iha alegasaun Prokurador Renato Bere Nahac deklara katak, matein nafatin akuzasaun neebe iha, maske vidru nee ho valor kiik, maibe fatin nee hanesan postu Polisia nian, utilizasaun ema ruma problema ba hatoo keixa iha neeba, no postu nee sai seguransa ba komunidade sira. Ho nunee Ministeriu Publiku husu Tribunal atu aplika pena suspensaun ba arguidu, atu iha futuru labele halo tan aktu nee.
Enkuantu defeza arguidu nian, João de Carvalho deklara katak, arguidu konfesa imparsial ba faktus, no arguidu deklara laos arguidu mak lori fatuk tuda vidru rahun. Tanba nee defeza husu Tribunal atu absolve arguidu.
Tuir akuzasaun katak, iha loron 31 fulan Dezembru tinan 2021, por volta 22h:00 kalan, joven sira iha Bairo Manleuana halai motor halo barulhu ba mai, tanba nee testemunha inisial DSSX hanesan membru PNTL halao seguransa iha Postu Manleuana husu apoiu hodi mai iha fatin akontesimentu.
Por volta 23h:48 fatin hanesan ema ida ho motor KLX halai ho makaas, tanba nee testemunha sai ba haree, la kleur arguidu lori fali nia motor marka Vixon kor mutin halai halo barulhu iha pos oin, tanba nee nia hapara hodi halo aprensaun ba arguidu nia motor.
Testemunha hateten ba iha arguidu hodi dehan, ohin padre ho madre sira avizu atu labele halo barulhu, maibe o hanesan membru KPK halo fali asaun ida nee hodi kontaktu ba iha Xefe KPK atu mai iha fatin akontesimentu.
Membru KPK ida mai ho Xefe KPK iha fatin akontesimentu, tanba nee testemunha informa ba sira hodi dehan, bainhira iha enkontru karik fo hatene ba arguidu atu labele halo tan iha futuru.
Arguidu hamutuk ho Xefe KPK foti motor fila, liu deit minutu 15, arguidu foti fatuk hodi tuda ba iha Postu Polisia Manleuan kona iha vidru janela halo rahun.
Testemunha kontaktu ba iha Polisia BOP hodi mai iha fatin akontesimentu, no la kleur Polisia too hodi detein arguidu besik iha fatin akontesimentu.
Konsekuensia husi arguidu nia asaun nee halo vidru janela Postu Polisia Manleuana rahun.
Arguidu lori fatuk tuda rahun janela Postu Polisia Manleuana, tanba testemunha halo aprensaun ba nia motor.
Arguidu hatene katak, bainhira lori fatuk tuda vidru Postu Polisia Manleuan rahun, maibe argiudu tuda nafatin.
Arguidu halo krimi ho livre, deliberada, konsentemente no hatene katak hahalok nee lei bandu no kastigu tuir lei.
Arguidu hanesan autor material ba krimi Danu Agravadu previstu iha artigu 259 husi kodigu penal (KP).
Audensia julgamentu nee prezide husi Juiz Koletivu, Afonso Carmona, Jose Escurial, Fransisca Cabral, Ministeriu Publiku Renato Bere Nahac, arguidu hetan asistensia legal husi Defensor Publiku Joao de Carvalho.
(ter)
